عمران خان اپنی کارکردگی کے بوجھ تلے دب گئے ہیں۔ اب وہ مزید اقتدار میں نہیں رہ سکتے
اسلام آباد : پاکستان مسلم لیگ (ن) کی نائب صدر مریم نواز نے کہا ہے کہ نوازشریف پاکستان واپسی کے لیے بے چین ہیں، بہت جلد واپس آجائیں گے،پاکستان ان کا ملک اور مٹی ہے، عمران خان کے پاس اب بھی عوام کی جان چھوڑنے کا وقت ہے، عمران خان اپنی کارکردگی کے بوجھ تلے دب گئے ہیں، اب وہ مزید اقتدار میں نہیں رہ سکتے ہیں۔ منگل کو میڈیا سے گفتگو کرتے ہوئے نائب صدر مسلم لیگ نون مریم نواز نے کہا کہ نیب نے آج کارروائی ملتوی کرنے کی درخواست کی ہے، نیب سے ثبوتوں سے متعلق عدالت میں سوال ہوئے، نیب کے پاس عدالت میں پیش کرنے کیلئے کوئی جواب نہیں تھا۔ انہوں نے کہا کہ آج نیب نے التواء مانگا ہے اور کہا ہے کہ پراسیکیوٹر کی طبیعت ناساز ہے، وہ بھی وقت تھا جو روزانہ کی بنیاد پر سماعت کی استدعا کرتا تھاآج التواء مانگ رہا ہے۔ مریم نواز نے کہا کہ خیبرپختونخواہ بلدیاتی انتخابات کا نتیجہ پاکستان تحریک انصاف کی ناقص کارکردگی ہے، تحریک انصاف کا ٹکٹ رسوائی کا ٹکٹ بن چکا ہے، تحریک انصاف پہلی حکومت ہے جو ایک کے بعد ایک انتخابات ہار رہی ہے، تحریک انصاف کو لاہور، خانیوال، پشاور اور خیبرپختونخواہ کے ہر ضلع سے شرمناک شکست ہوئی، تحریک انصاف پارٹی کے رہنما عوام میں ہیلمٹ پہن کر جائیں۔ انہوں نے کہا کہ عمران خان کے پاس اب بھی موقع ہے استعفیٰ دے دیں اور عوام کی جان چھوڑ دیں، اس کے بعد برا وقت آنے والا ہے۔مریم نواز نے کہا کہ شہباز شریف پارٹی کے صدر اور سب کے لیڈر ہیں، پارٹی کے فیصلوں کا اختیار نواز شریف کے پاس ہے، ہم نے اپنی جماعت کوکہا ہے کہ خیبرپختونخواہ پر خاص توجہ کی ضرورت ہے، پشاور میں ایک بی آر ٹی ہے جو چلتی کم اور جلتی زیادہ ہے،کبھی مشرف ہوتے تھے جو مکے دکھا کر کہتے تھے کہ نواز شریف تاریخ بن گئے، اس کے بعد نواز شریف نے تیسری بار وزارت عظمیٰ کا حلف اٹھایا، مولانا فضل الرحمن کی فتح ہماری فتح ہے، مولانا فضل الرحمن کو کے پی الیکشن میں کامیابی پر مبارکباد دیتی ہوں،نواز شریف جلد وطن واپس آئیں گے،مجھ سمیت ہم سب چاہتے ہیں کہ نواز شریف وطن واپس آئیں وہ وطن واپسی کیلئے بے چین ہیں۔مریم نواز نے صحافی کے سوال کا جواب دیتے ہوئے کہا کہ او آئی سی کانفرنس افغانستان مسئلے کیلئے بلائی گئی تھی، مقبوضہ کشمیر پاکستان کی شہ رگ ہے اور وہاں پر ہندوستانی مظالم کی مذمت کرتے ہیں۔صحافی کے ویڈیو لیک کے حوالے سے سوال پر مریم نواز سوال گول کر گئیں۔