پیرس۔5 نومبر (سیاست ڈاٹ کام ) پیرس ماسٹرز کے سیمی فائنل ٹورنمنٹ سے دستبردار ہونے والے اسپین کے رافیل نڈال 12 ماہ بعد ایک مرتبہ پھر عالمی درجہ بندی میں دنیا کے نمبر ایک ٹینس کھلاڑی بن گئے ہیں۔ نڈال گزشتہ سال 4 نومبر کو نمبر ایک مقام پر فائز تھے اور انہوں نے عالمی درجہ بندی میں پہلے مقام پر 196 واں ہفتہ مکمل کیا تھا۔ اس کے ٹھیک 12 ماہ بعد وہ سربیا کے نوواک جوکووچ سے نمبر ایک چھین لیا ہے۔ جوکووچ نے پانچویں مرتبہ پیرس ماسٹرز کا خطاب جیت لیا لیکن وہ نڈال کو نمبر ون بننے سے نہیں روک سکے۔ نڈال 1973 کے بعد سے اے ٹی پی درجہ بندی میں سرفہرست پہنچنے والے دوسرے عمر درازکھلاڑی بن گئے ہیں۔ سوئٹزرلینڈ کے راجر فیڈرر2018 میں 36 سال کی عمر میں نمبر ایک کھلاڑی کا اعزاز حاصل کیا تھا ۔ 33 سالہ نڈال نے جوکووچ کو دوسرے مقام پر چھوڑا ہے اور وہ اپنے کیریئر میں پانچویں مرتبہ سال کی تکمیل نمبر ایک کے طور پر کرنے کی سمت میں مضبوطی سے آگے بڑھ رہے ہیں۔ نڈال نے اس سے پہلے 2008، 2010، 2013 اور2017 میں سال کی تکمیل نمبر ایک کے طور پر کی تھی۔ اس مہینے ہونے والے اے ٹی پی فائنلس میں اگر نڈال سال کا اختتام نمبر ایک کے طور پر کرنے کی کامیابی حاصل کر لیتے ہیں تو وہ تاریخ میں ایسا کرنے والے سب سے عمردرازکھلاڑی ہوں گے۔ اسپین کے رافیل نڈال پہلی مرتبہ 18 اگست 2008 کو 22 سال کی عمر میں نمبر ایک بنے تھے اور 46 ہفتے سرفہرست رہے تھے۔ وہ 2010-11 میں 56 ہفتے، 2013-2014 میں 39 ہفتے، 2017-18 میں 26 ہفتے، 2018 میں اپریل مئی میں چھ ہفتے، مئی۔جون میں چار ہفتے اور جون ۔نومبر میں 19 ہفتے نمبر ایک مقام پر رہے تھے۔نڈال آٹھویں مرتبہ نمبر ایک مقام پر پہنچے ہیں اور انہوں نے آئیون لینڈل کی برابری کر لی ہے۔ وہ اس معاملے میں امریکہ کے جان میکنرو (14)، پیٹ سمپراس (11) اور جمی ونرس (9) سے پیچھے ہیں۔ ٹینس کی تاریخ میں فیڈرر کے نام سب سے زیادہ 310 ہفتے سرفہرست رہنے کا ریکارڈ ہے۔ سمپراس 286 ہفتے، جوکووچ 275 ہفتے، لینڈل 270 ہفتے اور کونرس 268 ہفتے نمبر ایک پر رہے تھے۔ نڈال کا اعلی ترین درجہ بندی پر یہ 197 واں ہفتہ شروع ہو رہا ہے۔ جوکووچ نے پیرس ماسٹرز خطاب جیت کر اے ٹی پی ریس ٹو لندن کی دوڑ میں اپنے نشانات میں 1000 نشانات شامل کرلئے ہیں۔ ان کے اب 8945 نشانات ہو گئے ہیں اور وہ نڈال کے 9585 نشانات سے صرف 640 پوائنٹس پیچھے ہیں۔ نڈال اگرچہ پیرس ماسٹرز کے سیمی فائنل دستبردارہوئے لیکن ان کا ارادہ 10 سے 17 نومبر تک لندن میں ہونے والے اے ٹی پی فائنلس میں مکمل فٹنس کے ساتھ اترنے کا ہے۔
