میڈرڈ ۔ اسپین کے ٹینس اسٹار اور عالمی نمبر دو رافل نڈال نے گرانڈ سلام کے اختتام کے ایک دن بعد شروع ہونے والے میڈرڈ اوپن ٹینس ٹورنمنٹ میں کھیلنے کے ارادہ کی تصدیق کی ہے جبکہ اپنے یو ایس اوپن ٹینس ٹورنمنٹ خطاب کے دفاع کے امکان پر مزید شکوک و شبہات کا اظہار کیا ہے۔34 سالہ نڈال نے گذشتہ سال نیو یارک میں اپنا 19 واں گرانڈ سلام جیتا ہے۔ ترمیم شدہ اے ٹی پی کیلنڈر کے تحت اب یو ایس اوپن رواں سال 31 اگست تا 13 ستمبر تک کھیلا جائے گا۔ میڈرڈ اوپن ٹینس ٹورنمنٹ کے ڈائریکٹر فیلسیانو لوپیز نے کہا ہے کہ رافل نڈال نے میڈرڈ اوپن میں شرکت کی تصدیق کر دی ہے۔ نڈال نے سماجی رابطوں کی ویب سائٹ پر اپنے دیرینہ ڈیوس کپ کے ساتھی کی طرف سے جواب دیا ہے کہ ہم ستمبر میں میڈرڈ اوپن میں ملتے ہیں۔ نڈال نے گزشتہ ماہ کہا تھا کہ میری اس وقت فلشنگ میڈو کا سفر کرنے کی بہت کم خواہش ہے۔ گزشتہ سال کے یو ایس اوپن ٹینس ٹورنمنٹ کے فائنل میں نڈال کی روس کے ڈینیئل میڈویڈوف کے خلاف پانچ سیٹ کی پر جوش کامیابی نے انہیں سوئس سٹار راجر فیڈرر کے 20 گرانڈ سلام کے ایک ریکارڈ میں شامل کر دیا تھا اور اب وہ راجر فیڈرر کا 20 گرانڈ سلام خطاب جیتنے کا ریکارڈ برابر کرنے میں صرف ایک خطاب کے منتظر ہیں۔ نڈال نے اب تک 19 فرنچ اوپن ٹینس ٹورنامنٹ کھیلے ہیں جن میں سے انہوں نے 12 خطابات اپنے نام کئے ہیں۔ نئے اے ٹی پی کیلنڈر شیڈول کے مطابق فرنچ اوپن ٹینس ٹورنامنٹ 27 ستمبر سے رولینڈ گراس پر شروع ہوگا۔ نڈال کے پاس راجر فیڈررکا 20 گرانڈ سلام کا ریکارڈ برابر اور توڑنے کا بہترین موقع ہے کیونکہ 38 سالہ سوئس اسٹار راجر فیڈرر رواں سال کے شروع میں گھٹنے کی سرجری کے بعد بقیہ 2020ء سیزن سے دستبردار ہو گئے ہیں۔وہ فٹنس مسائل سے چھٹکارہ حاصل کرنے کے بعد آئندہ سال ٹینس کورٹس میں ایکشن میں نظر آئیںگے۔17 گرانڈ سلام خطابات کے فاتح سربیائی اسٹار نواک جوکووچ جنہوں نے کورونا وائرس سے متاثر ہونے سے پہلے یو ایس اوپن کے بارے میں ابتدائی شکوک و شبہات کو ختم کیا تھا، تاحال یو ایس اوپن ٹینس میں شرکت کی تصدیق نہیں کی ہے۔ چھ بار ڈبلیو ٹی اے یو ایس اوپن ٹینس ٹورنمنٹ کی فاتح امریکن ٹینس اسٹار سرینا ولیمز نے تصدیق کی ہے کہ وہ فلشنگ میڈو میں بھرپور شرکت کریں گی۔ واضح رہے کہ پیشہ ورانہ دورے کورونا وائرس وبائی مرض کی وجہ سے مارچ کے بعد معطل ہونے کے بعد آئندہ ماہ کے اوائل میں شروع ہوںگے۔
