کیڈر و قائدین کو ٹکراؤ ترک کرکے قومی دھارے میں شامل ہونے خود سپرد لیڈر ’ وینو ‘ کا مشورہ
حیدرآباد۔20۔نومبر(سیاست نیوز) ماؤسٹوں کے خلاف کارروائی میں سرکردہ نکسلائٹ قائد کی ہلاکت کے ردعمل میں جوابی حملوں کے اندیشوں پر سیکوریٹی میں اضافہ کردیا گیا ۔سیکوریٹی فورسس کی کارروائی کے بعد خودسپرد ماؤیسٹ رہنماء وینو نے دیگر ماؤسٹوں سے اپیل کی کہ وہ خود کو ہلاکت میں ڈالنے کی بجائے خودسپردگی اختیار کرکے سماجی دھارے میں شامل ہوجائیں ۔کل آندھرا پردیش میں 7 سرکردہ ماؤسٹ قائدین کی ہلاکت اور ماؤسٹ سنٹرل کمیٹی رکن ترپتی عرف آزاد(دیوجی) کے شامل ہونے کی اطلاعات پر سیکوریٹی فورسس نے چوکسی اختیار کرلی ہے کیونکہ دو یوم قبل ہڈما اور ان کی اہلیہ کی ہلاکت کے دوسرے ہی دن آزاد کی ہلاکت کی اطلاع کے بعد ماؤسٹوں کے ردعمل ظاہر کے اندیشے بڑھ گئے ۔ کہا جارہا ہے کہ ماؤسٹ قائدین جلد کوئی کاروائی کرسکتے ہیں اسی لئے سیکوریٹی فورسس کو متحرک رہنے کے علاوہ انہیں تلاشی مہم میں شدت پیدا کرنے کی ہدایت دی گئی ہے۔ بتایاجاتا ہے کہ انٹلیجنس ایجنسیوں نے سیکوریٹی فورسس کی کارروائیوں میں ہلاکتوں کے بعد ماؤسٹوں کے ردعمل سے متنبہ کیا جبکہ حکومت کی ماؤسٹ قائدین اور کیڈر کو خودسپردگی اسکیم کے تحت معافی کے بعد قومی دھارے میں شامل سرکردہ ماؤسٹ قائد ’وینو‘ نے ان ہلاکتوں کے بعد ردعمل میں کہا کہ ماؤسٹ کیڈر اور قائدین کو ٹکراؤ کی پالیسی ترک کرکے فوری ہتھیار ڈالنے اور خودسپردگی اختیار کرکے جان بچانی چاہئے اور قومی دھارے میں شامل ہوکر نظریاتی سیاسی جدوجہد جاری رکھنا چاہئے ۔ذرائع کے مطابق سیکوریٹی فورسس ماؤسٹوں کے ردعمل سے نمٹنے تیار ہیں اور جن ریاستوں و اضلاع میں ماؤیسٹ سرگرمیاں جاری ہیں ان پر گہری نظر رکھی ہے تاکہ کسی بھی کاروائی کو روکا جاسکے۔3
