بالی، 23 دسمبر(یو این آئی ) انڈونیشیا کے28 سالہ دائیں ہاتھ کے فاسٹ بولر گیڈ پری یاندا نے ٹی20 بین الاقوامی کرکٹ میں وہ کارنامہ انجام دے دیا ہے جو اس سے قبل مردوں یا خواتین کی بین الاقوامی کرکٹ میں کوئی نہ کر سکا۔ گیڈ پری یاندا نے کمبوڈیا کے خلاف میچ کے ایک ہی اوور میں5 وکٹیں حاصل کر کے کرکٹ کی تاریخ میں اپنا نام سنہری حروف سے لکھوا لیا۔کمبوڈیا کی ٹیم168 رنزکے تعاقب میں 15 اوورز تک106 رنز بنا چکی تھی، اس کے بعد گیڈ پری یاندا اپنا پہلا اوورکرنے آئے اور میچ کا نقشہ ہی بدل دیا، مسلسل تین وکٹیں لے کر اپنی ہیٹ ٹرک مکمل کی۔ انہوں نے شاہ ابرار حسین، نرمل جیت سنگھ اور چنتھون رتھانک کو پویلین بھیجا۔ پانچویںگیند مونگدارا ساک کو آؤٹ کرکے چوتھی وکٹ لی۔ ایک وائیڈ بال کے بعد پیل ویناک کو آوٹ کرتے ہوئے ایک ہی اوور میں5 وکٹوں کا ریکارڈ بنا لیا۔اس تباہ کن اسپیل کی بدولت کمبوڈیا کی پوری ٹیم لڑکھڑاگئی اور انڈونیشیا نے یہ میچ60 رنز سے جیت لیا۔اگرچہ ڈومیسٹک کرکٹ میں بنگلہ دیش کے الامین حسین(2013) اور ہندوستان کے ابھیمنیو متھن (2019) ایک اوور میں5 وکٹیں لے چکے ہیں، لیکن انٹرنیشنل کرکٹ کی سطح پر یہ اپنی نوعیت کا پہلا واقعہ ہے ۔اس سے قبل بین الاقوامی کرکٹ میں ایک اوور میں4 وکٹیں لینے کے 14 واقعات ریکارڈ پر موجود ہیں، جن میں سری لنکا کے لستھ ملنگا کا 2019 میں نیوزی لینڈ کے خلاف مسلسل4 گیندوں پر4 وکٹیں لینا سب سے مشہور ہے بولنگ میںگیڈ پری یاندا کے ریکارڈ سے پہلے ، انڈونیشیا کے وکٹ کیپر دھرما کیسوما نے بیٹنگ میں جوہر دکھائے ۔ انہوں نے صرف 68 گیندوں پر110 رنزکی ناقابل شکست اننگزکھیلی، جس میں8 چوکے اور6 چھکے شامل ہیں۔