نورپور 19 دسمبر(یو این آئی) ہماچل پردیش کانگریس کے سابق ترجمان سدرشن شرما نے الزام لگایا ہے کہ نیشنل ہیرالڈ معاملے میں انفورسمنٹ ڈائریکٹوریٹ کی کارروائی ’’بدنیتی اور سیاسی اغراض پر مبنی ‘‘ ہے اور یہ ایک وسیع سیاسی سازش کا حصہ ہے ۔ شرما نے یہاں میڈیا سے بات کرتے ہوئے کہا کہ اس معاملے میں کوئی ایف آئی آر درج نہیں کی گئی ہے ، اس لیے کانگریس رہنما سونیا گاندھی اور راہول گاندھی کے خلاف کوئی فوجداری کیس نہیں بنتا۔ انہوں نے دعویٰ کیا کہ اس معاملے میں شروع سے ہی کوئی فوجداری بنیاد موجود نہیں تھی۔ شرما نے کہا کہ عدالت نے ینگ انڈین معاملہ کو یہ کہتے ہوئے مسترد کر دیا کہ یہ سیاسی انتقام اور بدنیتی سے متاثر کیس ہے ۔ انہوں نے کہا کہ عدالت کے فیصلے سے واضح ہو گیا ہے کہ اس معاملے میں کوئی فوجداری بنیاد نہیں تھی۔