دبئی 26اکتوبر (یو این آئی ) انٹرنیشنل کرکٹ کونسل نے کرکٹ میچ میں وائیڈ بال کے قوانین میں نیا تجربہ شروع کر دیا ہے ۔ ہندوستان اورآسٹریلیا کے درمیان پرتھ میں کھیلے گئے پہلے ونڈے میچ میں وکٹ کے دونوں جانب نیلے رنگ کی نئی لکیروں کا استعمال کیا گیا۔ اسی طرح بنگلہ دیش اور ویسٹ انڈیز کے درمیان میرپور میں پہلے ونڈے میں بھی نئی لکیریں دیکھی گئیں۔ آئی سی سی لیگ اسٹمپ کے قریب وائیڈ بال کے نئے قانون کا چھ ماہ کے ٹرائل مرحلے کے تحت تجربہ کر رہی ہے ۔ اگر یہ تجربہ کامیاب رہا تو اسے وائٹ بال کرکٹ میں باضابطہ نافذ کیا جائے گا۔ پرانے قانون کے مطابق، اگر گیند لیگ اسٹمپ کے قریب بھی جاتی تھی تو اسے وائیڈ قرار دیا جاتا تھا، جس سے بیاٹرز کو زیادہ فائدہ ہوتا اور بولرز کی غلطی کی گنجائش کم تھی۔ نئے قانون میں لیگ اسٹمپ کے قریب نئی لکیریں لیگ سائیڈ پر جانے والی وائیڈ بال کا تعین کریں گی۔ اگر گیند لکیر کے اندر سے گزرے تو اسے وائیڈ نہیں کہا جائے گا، صرف لکیر سے باہر والی گیند ہی وائیڈ ہوگی۔
