ویلنگٹن : نیوزی لینڈ کویڈ 19 کے خاتمے کی اپنی اسٹریٹیجی ترک کر رہا ہے۔ پیر کے روز وزیر اعظم جیسنڈا آرڈن نے کہا کہ یہ تبدیلی اس انداز میں کی جا رہی ہے جو ہم وقت کے ساتھ ساتھ اختیار کرتے جا رہے ہیں۔بقول ان کے، ڈیلٹا ویرئینٹ نے تبدیلی کے انداز کو تیز تر کر دیا ہے، ویکسینز اس کی مدد کریں گی۔نیوزی لینڈ میں انتہائی تیزی سے پھیلنے والے ڈیلٹا ویرئینٹ کی آمد نے ملک میں گزشتہ سال کویڈ 19 کے کیسز کی تعداد کم کر کے زیرو تک لانے کے طریقہ کار کو دہرانا مشکل کر دیا ہے۔ عہدے داروں نے پیر کے روز کویڈ 19 کے 29 نئے کیسز کی اطلاعات دیں۔نیوزی لینڈ میں کوویڈ 19 کے سب سے زیادہ کیسز آک لینڈ میں سامنے آئے جہاں پچاس دن کا لاک ڈاون نافذ کیا جا چکا ہے۔پیر کے روز ایک نیوز کانفرنس کے دوران جیسنڈا آرڈن نے کہا کہ یہ واضح ہے کہ ایک لمبے عرصے تک کوویڈ 19 کی روک تھام کے لئے عائد سخت پابندیوں کے باوجود اس کا مکمل طور پرخاتمہ نہیں ہو سکا۔ مگر یہ پابندیاں اس لئے اہم تھیں کہ اس وقت ہمیں ویکسنز دستیاب نہیں تھیں۔تاہم، انھوں نے کہا کہ اب ویکسینز ہمارے پاس موجود ہیں۔ اسلئے ہم جس انداز میں کام کر رہے تھے اس کی تبدیلی کا آغاز کر سکتے ہیں۔
