آکلینڈ / برلن / میڈرڈ : 14 ستمبر ( ایجنسیز ) نیوزی لینڈ، جرمنی اور اسپین سمیت اسرائیل کے دارالحکومت تل ابیب میں بھی ہزاروں افراد نے غزہ جنگ بندی کا مطالبہ کیا۔نیوزی لینڈ کے شہر آکلینڈ میں فلسطینیوں کی حمایت میں ہزاروں افراد نے مارچ کیا، اس دوران مظاہرین نے فلسطینی پرچم لہراتے ہوئے اسرائیل پر پابندیاں لگانے کا مطالبہ کیا۔جرمنی کے دارالحکومت برلن میں بھی ریلی میں مظاہرین نے غزہ میں نسل کْشی روکنے کا مطالبہ کیا۔ادھر اسپین میں سائیکلنگ ریس میں اسرائیلی ٹیم کی شرکت پر فلسطین کے حامیوں نے احتجاج کیا اور اسرائیل کا بائیکاٹ کرنے کا مطالبہ کیا۔دوسری جانب تل ابیب میں بھی ہزاروں اسرائیلیوں نے غزہ جنگ بندی کا مطالبہ کرتے ہوئے ‘نیتن یاہو صدر ٹرمپ کو دھوکا دینا بند کرو’ کے بینر اٹھا کر احتجاج ریکارڈ کروایا۔
اسرائیل کی غزہ میں ایک رہائشی عمارت پر بمباری،41 جاں بحق
غزہ ، 14 ستمبر (یواین آئی) اسرائیل نے غزہ کے تل الحوا علاقے میں ایک رہائشی عمارت کو نشانہ بنایا جس میں کئی افراد شہید اور زخمی ہوئے ، مغربی غزہ شہر میں واقع یہ عمارت اُس بے گھر افراد کے کیمپ کے سامنے تھی جہاں سیکڑوں خاندان پناہ لیے ہوئے ہیں۔ غزہ کے طبی ذرائع کے مطابق اتوار کی صبح سے اب تک 41 فلسطینی شہید ہوچکے ہیں۔دھماکے کے باعث شیل اور ملبہ کیمپ میں جا گرا، جس سے خیموں کے اندر موجود کئی افراد شہید اور زخمی ہوئے ۔
