لاہور: سہ ملکی سیریز کے دوسرے میچ میں نیوزی لینڈ نے جنوبی افریقہ کو آج 6 وکٹ سے شکست دے کر فائنل کے لیے کوالیفائی کرلیا۔ لاہور میں کھیلے گئے میچ میں نیوزی لینڈ نے افریقی ٹیم کے خلاف ٹاس جیت کر پہلے بولنگ کا فیصلہ کیا۔ مقررہ 50 اوورز میں پروٹیز نے کیویز کے خلاف 6 وکٹوں کے نقصان پر 304 رنز اسکور کیے۔ نیوزی لینڈ نے 305 رنز کا ہدف 4 وکٹوں کے نقصان پر 49 ویں اوور میں پورا کرلیا۔ تجربہ کار بیاٹر کین ولیمسن نے ناٹ آؤٹ سنچری اسکور کرتے ہوئے کیویز کو بہ آسانی فائنل تک پہنچا دیا۔ جنوبی افریقہ کی جانب سے میتھیو بریٹزکے نے ڈیبیو پر 150 رنز بناکر ونڈے کرکٹ کا نیا ریکارڈ قائم کیا مگر اُن کی ٹیم میچ ہار گئی۔ اس کے علاوہ ویان ملڈر نے 64 اور جیسن اسمتھ نے 41 رنز بنائے۔ کیوی بولرز میٹ ہینری اور ول او رورکی نے دو، دو وکٹیں لئے۔ ’مین آف دی میچ‘ ولیمسن نے113 گیندوں پر 133 رنز کی شاندار اننگز کھیلی۔ ان کے علاوہ ڈیوان کانوے 97 رنز بنا کر آؤٹ ہوئے جبکہ گلین فلپس نے28 رنز (ناٹ آؤٹ) بنائے۔ جنوبی افریقہ کی جانب سے سینوران موتھوسیمی نے 2 وکٹیں لئے جبکہ ایتھان بوش اور جونیئرڈالا نے ایک ایک وکٹ لی۔ واضح رہے کہ 3 ملکی سیریز کے ہفتہ کو پہلے میچ میں نیوزی لینڈ نے پاکستان کو 78 رنز سے شکست دی تھی۔ نیوزی لینڈ نے پہلے بیٹنگ کرتے ہوئے میزبانوں کو 331 رنز کا ٹارگٹ دیا تھا، لیکن محمد رضوان زیرقیادت ٹیم 252 رنز بنا کر آؤٹ ہو گئی تھی۔12 فبروری کو کراچی میں پاکستان اور جنوبی افریقہ کا میچ ہوگا اور اس کا ونر کراچی میں ہی 14 فبروری کو فائنل میں نیوزی لینڈ کا مقابلہ کرے گا۔
