حیدرآباد16مئی (یواین آئی)تقریبا 121ہندوستانی باشندے جو کورونا وائرس کے نتیجہ میں نافذ کردہ لاک ڈاون کی وجہ سے امریکہ میں پھنس گئے تھے ،ایرانڈیا کی فلائٹ سے حیدرآباد واپس ہوگئے ۔یہ افراد بین الاقوامی سفری پابندیوں کے سبب امریکہ میں پھنس گئے تھے ۔ہفتہ کی صبح کی اولین ساعتوں میں شہر حیدرآباد کے شمس آباد ایرپورٹ پر اس وندے بھارت فلائٹ جس کا نمبرAI 1839ہے ، نے لینڈنگ کی۔9مئی سے 15مئی تک ایرانڈیا کی جانب سے امریکہ سے ہندوستان کے لئے سات نان شیڈول کمرشیل فلائٹس چلائی گئیں تاکہ ہندوستانی باشندوں کی واپسی کے سلسلہ میں سہولت پہنچائی جاسکے ۔ایرانڈیا کی فلائٹ 14مئی کو نئی دہلی/حیدرآباد کے لئے نیوجرسی سے 121مسافرین کے ساتھ روانہ ہوئی تھی۔یہ امریکہ سے ہندوستان کے لئے چھٹویں نان شیڈول کمرشیل فلائٹ تھی۔پہلی فلائٹ نے سان فرانسسکو سے گذشتہ ہفتہ کو ممبئی اور حیدرآباد کے لئے اڑان بھری تھی۔اس طیارہ کی آمد سے پہلے ہی ایرپورٹ کے تمام علاقہ کو جراثیم سے پاک بنایاگیا۔ان تمام مسافرین کو 14دنوں کے لئے الگ تھلگ کردیاگیا۔
