واشنگٹن،23اپریل (سیاست ڈاٹ کام) امریکہ میں پہلی مرتبہ بلیوں میں کورونا وائرس کی تشخیص ہوئی ہے ۔ ریاست نیویارک میں جہاں مریضوں سے متعلق کورونا وائرس کی بدترین صورتحال ہے اب وہاں 2 پالتو بلیوں میں کورونا وائرس کی تشخیص ہوئی ہے ۔حکام کے مطابق ریاست نیویارک میں ایک بلی کا سانس میں تکلیف کے باعث ٹسٹ کیاگیا تو اس میں کورونا کی تشخیص ہوئی، تاہم اس گھر کا کوئی اور فرد وائرس سے متاثر نہیں ہے جبکہ دوسرے علاقہ میں جس بلی میں کورونا وائرس کی تشخیص ہوئی اس کا مالک اس بیماری سے متاثر ہو چکا ہے۔ امریکی میڈیا کے مطابق حکام کا کہنا ہیکہ امریکہ میں پالتو جانوروں کے ذریعہ کورونا وائرس پھیلنے کے کوئی ثبوت نہیں ملے ہیں۔اس سے پہلے نیویارک میں ایک شیراورچیتے میں بھی کورونا وائرس کی تشخیص ہو چکی ہے ۔
