مہاراج گنج 3 مارچ ( یو این آئی): پڑوسی ملک نیپال میں 5 مارچ کو ہونے والے ایوان نمائندگان کے انتخابات کے پیشِ نظر ہند-نیپال بین الاقوامی سرحد کو 72 گھنٹے پہلے سیل کر دیا گیا ہے ۔ انتخابی عمل کو منصفانہ، پُرامن اور شفاف طریقے سے مکمل کرانے کے مقصد سے یہ احتیاطی قدم اٹھایا گیا ہے ، تاکہ کسی بھی قسم کی بیرونی سرگرمی یا شر پسند عناصر کی آمد و رفت کو مکمل طور پر روکا جا سکے ۔ضلع مہاراج گنج کی نیپال سے ملحق تقریباً 84 کلومیٹر طویل بین الاقوامی سرحد پر سکیورٹی انتظامات کو غیر معمولی طور پر سخت کر دیا گیا ہے۔ 2 مارچ کو رات 12 بجے سے سرحد پر عام شہریوں کی آمد و رفت مکمل طور پر بند کر دی گئی ہے ۔ صرف اشیائے ضروریہ کی فراہمی اور ہنگامی خدمات سے متعلق گاڑیوں کو سخت جانچ کے بعد آنے جانے کی اجازت دی جا رہی ہے۔ سوناؤلی بارڈر پر سکیورٹی ایجنسیاں پوری طرح مستعد نظر آئیں۔ ناؤتانوا کے ایس ڈی ایم نوین کمار نے بتایا کہ نیپال انتخابات کے پیشِ نظر سرحد کو مکمل طور پر سیل کر دیا گیا ہے اور عوامی نقل و حرکت پر پابندی عائد کر دی گئی ہے ۔ صرف ہنگامی خدمات جاری رہیں گی۔ سشستر سیما بل (ایس ایس بی) کے جوان مسلسل گشت کر رہے ہیں اور بارڈر پر نصب سی سی ٹی وی کیمروں کے ذریعے ہر سرگرمی پر کڑی نظر رکھی جا رہی ہے ۔ ایس ایس بی کی 22 ویں بٹالین کے اسسٹنٹ کمانڈنٹ سی۔ وویک نے واضح کیا کہ پیر کی رات 12 بجے سے جمعرات کی رات 12بجے تک سرحد مکمل طور پر بند رہے گی۔ روپن دیہی ضلع کے ایس پی جنک بہادر شاہی نے بتایا کہ نیپال میں ہونے والے انتخابات کے پیشِ نظر سرحدی علاقوں میں خصوصی چوکسی برتی جا رہی ہے ۔ 5 مارچ کو انتخابی عمل مکمل ہونے کے بعد رات 12 بجے سے سرحد پر آمد و رفت دوبارہ معمول پر آ جائے گی۔
انتظامیہ نے واضح پیغام دیا ہے کہ انتخابات کے دوران کسی بھی قسم کی لاپروائی یا غیر قانونی سرگرمی برداشت نہیں کی جائے گی۔ سرحد سیل ہونے کے باعث جہاں سکیورٹی ایجنسیاں ہائی الرٹ پر ہیں، وہیں عام شہریوں سے بھی تعاون کی اپیل کی گئی ہے تاکہ نیپال میں ہونے والے انتخابات پُرامن ماحول میں مکمل ہو سکیں۔
