سنگاپور۔ یکم اکٹوبر (سیاست ڈاٹ کام ) نیپال کے کپتان پارس کھڑکا نے ٹی 20 کرکٹ میں طوفانی اننگز کھیلتے ہوئے ویراٹ کوہلی اور اسٹیو اسمتھ کے عالمی ریکارڈ توڑ ڈالے۔ نیپال کے کپتان پارس کھڑکا نے سنگاپور کے خلاف ناٹ آوٹ سنچری بناکر نیا عالمی ریکارڈ بنایا۔ پارس نے 49 گیندوں میں اپنی سنچری مکمل کی ۔ سنگاپور کے کی جانب سے دئے گئے 152 رنوں کے ہدف کا تعاقب کرتے ہوئے پارس 52 گیندوں پر 106 رن بناکر ناٹ آوٹ رہے۔ ان کی اس شاندار اننگز کی بدولت نیپال کی ٹیم نے چار اوورس پہلے ہی ہدف حاصل کرلیا۔ اپنی اس تاریخی اننگز میں پارس نے سات چوکے اور 9 چھکے لگائے۔ سنگاپور نے سہ فریقی ٹی 20 سیریز میں پہلے بیٹنگ کرتے ہوئے نیپال کے خلاف مقررہ اوورز میں 151 رن بنائے۔ کپتان پارس نے ہدف کا تعاقب کرتے ہوئے ناٹ آوٹ 106 رنوں کی کی شاندار اننگز کھیلی۔ اسی کے ساتھ پارس دنیا کے پہلے ایسے ٹی 20 کپتان بن گئے ہیں ، جنہوں نے ہدف حاصل کرتے ہوئے سنچری بنائی ہے۔ مطلوبہ نشانہ حاصل کرتے ہوئے یہ کسی ٹی 20 کپتان کا سب سے بڑا اسکور ہے۔ اس سے پہلے یہ ریکارڈ نیدر لینڈز کے کپتان پیٹر سیلر کے نام تھا جنہوں نے ہدف کے تعاقب میں 96 رن بنائے تھے۔ آسٹریلیا کے سابق کپتان اسٹیو اسمتھ اس فہرست میں چوتھے مقام پر ہیں جبکہ ویرات کوہلی اس فہرست میں8 ویں نمبر پر ہیں۔ کوہلی نے 2017 میں سری لنکا کے خلاف 82 رنز کی اننگز کھیلی تھی۔
پارس نے صرف یہی ریکارڈ اپنے نام نہیں کیا بلکہ وہ ٹی 20 میں سب سے تیزترین سنچری بنانے والے تیسرے کپتان بھی بن گئے ہیں۔ سب سے تیز سنچری بنانے والے کپتانوں کی فہرست میں پہلے نمبر پر روہت شرما ہیں جنہوں نے سری لنکا کے خلاف 35 گیندوں میں سنچری بنائی تھی۔ ان کے بعد فاف ڈوپلیسس ہیں جنہوں نے 46 گیندوں میں سنچری بنائی ہے۔
