مرکزکے فیصلہ کاپرینکا گاندھی نے کیا خیرمقدم
نئی دہلی :مرکزی حکومت نے وائناڈ لینڈ سلائیڈنگ کو ’سنگین آفت‘ قرار دیا ہے۔ کانگریس کی جنرل سیکریٹری اور وائناڈ سے لوک سبھا کی رکن پرینکا گاندھی نے اس فیصلہ پر خوشی کا اظہار کرتے ہوئے فوری مالی امداد کا مطالبہ کیا۔ انہوں نے متاثرین کی بحالی کے لئے سنجیدہ اقدامات پر زور دیا ہے۔وزارت داخلہ نے کیرالہ حکومت کو ایک خط کے ذریعے مطلع کیا ہے کہ مرکزی کابینہ کمیٹی کے جائزے کی بنیاد پر لینڈ سلائیڈنگ کو اس زمرے میں شامل کیا گیا ہے۔ تاہم حکومت نے بحالی کے لئے خصوصی مالی امداد کے پیکیج پر کوئی وضاحت نہیں دی ہے۔پرینکا گاندھی نے وزیر داخلہ امیت شاہ سے اپیل کی ہے کہ وہ اس آفت کی شدت کو مدنظر رکھتے ہوئے بحالی کے لئے ضروری فنڈز فراہم کرنے پر فوری غور کریں۔ امیت شاہ نے بالآخر وائناڈ سانحہ کو ’سنگین نوعیت کی آفت‘ قرار دینے کا فیصلہ کیا۔ اس سے متاثرین کی بحالی میں مدد ملے گی۔
اور یہ ایک مثبت قدم ہے۔
اگر مناسب فنڈز جلدی فراہم کیے جائیں تو ہم سب شکر گزار ہوں گے۔قابل ذکر ہے کہ 4 دسمبر کو پرینکا گاندھی کی قیادت میں کیرالہ کے اراکین پارلیمنٹ کے ایک وفد نے امیت شاہ سے ملاقات کی تھی۔ ملاقات کے دوران پرینکا گاندھی نے حکومت سے مطالبہ کیا تھا کہ وہ متاثرین کو فوری مالی امداد فراہم کرے اور علاقے میں بنیادی ڈھانچے کی بحالی کا کام شروع کرے۔انہوں نے وزیر داخلہ سے اپیل کی کہ وہ ’جانبدار سیاست‘ سے بالاتر ہو کر وائناڈ کے لوگوں کے درد اور تکلیف کو سمجھیں۔ کیرالہ کے اراکین پارلیمنٹ نے بھی حکومت سے درخواست کی کہ وہ متاثرین کے گھروں، اسکولوں اور کاروبار کی بحالی کے لئے فوری فنڈز فراہم کرے۔