نئی دہلی: لوک سبھا میں قائد اپوزیشن راہول گاندھی نے منگل کو مرکزی حکومت پر زور دیا کہ وہ کیرالا کے وائناڈ میں لینڈ سلائیڈنگ کے تباہ کن واقعہ کے بعد وہاں راحت اور بچاؤ کاموں میں تیزی لائے۔لوک سبھا میں وقفہ صفر کے دوران راہول نے وائناڈ میں مٹی کے تودے گرنے کے واقعہ کے بارے میں کہاکہ آج صبح سویرے وائناڈ میں کئی جگہ تباہ کن لینڈ سلائیڈنگ ہوئی، جس میں 70 سے زائد افراد ہلاک ہو چکے ہیں۔منڈکائی گاؤں کا رابطہ منقطع ہو گیا ہے اور اس سانحے کے نتیجے میں جانی نقصان ہوا اور بڑے پیمانے پر مالی نقصان ہوا ہے، جس کا تخمینہ لگانا ابھی باقی ہے۔ راہول گاندھی نے کہا میں نے وزیر دفاع اور کیرالا کے وزیر اعلیٰ سے بات کی ہے۔ میں مرکزی حکومت سے درخواست کرتا ہوں کہ وہ بچاؤ کاری اور صحت سے متعلق خدمات کے لئے ہر ممکن مدد فراہم کرے اور ہلاک شدگان کو فوری معاوضہ دیا جائے۔ اس کے ساتھ ساتھ اگر معاوضہ بڑھایا جاسکتا ہے تو اسے بڑھایا جانا چاہئے۔ اہم ٹرانسپورٹ اور مواصلاتی نظام کو بحال کیا جائے، امدادی انتظامات جلد از جلد کئے جائیں اور متاثرہ خاندانوں کی بازآبادکاری اور بحالی کیلئے روڈ میاپ تیار کیا جائے۔ ہمارے ملک میں گزشتہ چند برسوں میں لینڈسلائیڈنگ میں خطرناک حد تک اضافہ دیکھنے میں آیا ہے۔ ماحولیاتی طور پر نازک اس خطے میں قدرتی آفات کی بڑھتی ہوئی تعدد سے نمٹنے کے لئے لینڈ سلائیڈنگ کے شکار علاقوں کا نقشہ بنانے اور ایکشن پلان بنانے کی فوری ضرورت ہے۔پارلیمانی امور کے وزیر کرن رجیجو نے کہا کہ کوئی بھی قدرتی آفت ملک کے لئے ایک سنگین معاملہ ہے۔ صرف کیرالا ہی نہیں یہ سب کے لیے تشویش کا باعث ہے۔ وزیر اعظم نریندر مودی نے کیرالا کے وزیر اعلیٰ سے ریاست کی صورتحال کے بارے میں بات کی ہے۔ راحت اور بچاؤ کا کام کیا جا رہا ہے۔
ہماچل میں بادل پھٹنے سے دکانیں بہہ گئیں
شملہ: ہماچل پردیش میں اب موسلادھار بارش کا سلسلہ شروع ہو گیا ہے ۔ کچھ دن پہلے منالی میں آنے والے سیلاب کے بعد اب کلو کے منی کرن میں بھی سیلاب آ گیا ہے ۔ یہاں منی کرن میں بادل پھٹا ہے جس کی وجہ سے دکانوں اور ہوٹلوں کو نقصان پہنچا ہے ۔ تاہم کوئی جانی نقصان نہیں ہوا ہے ۔پلچان کے نزدیک لیہہ منالی ہائی وے کو دوبارہ بند کردیا گیا ہے ۔
