حملہ دہشت گردکارروائی‘حملہ آور کو بھاری قیمت چکانی پڑے گی‘ صدر ٹرمپ کا شدید ردعمل
واشنگٹن۔27؍نومبر ( ایجنسیز )امریکی دارالحکومت میں وائٹ ہاؤس کے چند ہی قدموں کے فاصلے پر پیش آنے والے فائرنگ کے دل دہلا دینے والے واقعہ نے پورے واشنگٹن کو ہلا کر رکھ دیا۔حملہ آوروں نے فائرنگ کر کے نیشنل گارڈ کے دو اہلکاروں کو شدید زخمی کر دیا جن کی حالت نازک بتائی جاتی ہے ۔ پولیس نے فوری کارروائی کرتے ہوئے ایک مشتبہ شخص کو گرفتار کرلیا۔ وائٹ ہاؤس کو عارضی طور پر بند کردیا گیاجب کہ اطراف کے علاقے خصوصاً آئی اسٹریٹ کو سیل کر کے شہریوں کو دور رہنے کی ہدایت جاری کی گئی۔صدر ڈونالڈ ٹرمپ نے سخت ردِ عمل کا اظہار کرتے ہوئے حملہ کو دہشت گرد قرار دیا اور حملہ آور کو جانور قرار دیتے ہوئے کہا کہ نیشنل گارڈ پر حملہ کرنے والا بھاری قیمت چکائے گا۔صدر ٹرمپ کا کہنا ہے کہ دونوں اہلکار شدید زخمی ہیں جبکہ حملہ آور کو بھی زخمی حالت میں گرفتار کیا گیا ہے۔رونالڈ ریگن نیشنل ایئرپورٹ پر بھی پروازوں کو عارضی طور پر روک دیا گیا تاہم چند گھنٹوں بعد معمول کی کارروائیاں بحال کر دی گئیں۔امریکی سیکیورٹی اداروں کی ہنگامی پریس بریفنگ میں مزید 500 فوجیوں کی تعیناتی کا اعلان کیا گیا ۔امریکی وزیرِ جنگ پیٹ ہیگسیتھ نے کہا کہ یہ قومی سلامتی کا معاملہ ہے اور ہم واشنگٹن کو محفوظ بنانے کیلئے ہر ضروری قدم اٹھا رہے ہیں۔ایف بی آئی ڈائریکٹر کاش پٹیل نے کہا کہ حملہ آوروں نے گھات لگا کر حملہ کیا، سیکیورٹی اہلکاروں نے بہادری سے ان کا مقابلہ کیا۔کاش پٹیل نے مزید کہا کہ ملزم کو حراست میں لیا جا چکا ہے اور اس وقت واشنگٹن میں کوئی دوسرا مشتبہ شخص نہیں ہے۔بتا یا گیا ہے کہ حملہ آور افغانی شہری ہے اور اس کا نام رحمن اللہ ہے۔