ڈاکٹر وائی ایس راج شیکھر ریڈی کے یوم پیدائش پر راہول گاندھی کا ٹوئیٹ
حیدرآباد۔8۔جولائی (سیاست نیوز) وائی ایس آر ٹی پی کے کانگریس میں انضمام کی راہیں ہموار ہونے لگی ہیں اور سابق چیف منسٹر ڈاکٹر وائی ایس راج شیکھر ریڈی کی دختر مسز وائی ایس شرمیلا جلد ہی کانگریس میں شمولیت اختیار کرلیں گی! ڈاکٹر وائی ایس راج شیکھر ریڈی کے یوم پیدائش پر کانگریس قائد مسٹر راہول گاندھی نے اپنے ٹوئیٹر کے ذریعہ انہیں خراج عقیدت پیش کرتے ہوئے انہیں دوراندیش اور اپنے عوام کے لئے فکر کرنے والے قائد کی حیثیت سے یاد کیا اور کہا کہ ڈاکٹر ریڈی نے آندھراپردیش کے عوام کی بہتری کے لئے خدمات انجام دی ہیں جو ہمیشہ یاد رکھی جائیں گی۔ راہول گاندھی نے ڈاکٹر وائی ایس راج شیکھرریڈی کی خدمات کو خراج پیش کرتے ہوئے ان کی تصویر بھی ٹوئیٹر پر شئیر کی جس کے جواب میں مسز وائی ایس شرمیلا نے راہول گاندھی سے اظہار تشکر کرتے ہوئے کہا کہ ان کے والد اور تلگو عوام کے قائد کے لئے راہول گاندھی کے الفاظ انتہائی متاثر کن اور حقیقت پر مبنی ہیں۔ شرمیلا نے اپنے جوابی ٹوئیٹ میں کہا کہ ڈاکٹر وائی ایس راج شیکھر ریڈی ہمیشہ ہی کانگریس سے وابستہ قائد رہے اور انہوں نے تلگو عوام کی خدمت کرتے ہوئے اپنی جان تک دے دی۔ وائی ایس آر ٹی پری سربراہ نے اپنے ٹوئیٹ میں کہا کہ ملک کو راہول گاندھی کی قیادت میں ڈاکٹر راج شیکھر ریڈی جیسی طرز حکمرانی کا انتظار ہے جو کہ عوام کی فلاح و بہبود پر مبنی تھی۔ وائی ایس شرمیلا نے اپنے ٹوئیٹ کے بین السطور میں راہول گاندھی کی قیادت کا اعتراف کرتے ہوئے کہا کہ وہ اس بات سے بے حد متاثر ہوئی ہیں کہ راہول گاندھی کے دل میں اب بھی وائی ایس راج شیکھر ریڈی کی یادیں تازہ ہیں۔راہول گاندھی کے ڈاکٹر وائی ایس راج شیکھر ریڈی کے یوم پیدائش پر کئے گئے ٹوئیٹ کے جواب میں ڈاکٹر ریڈی کی دختر مسز وائی ایس شرمیلا کے جوابی ٹوئیٹ سے یہ بات واضح ہونے لگی ہے کہ وہ اب وائی ایس آر ٹی پی کو کانگریس میں ضم کرنے کے لئے پوری طرح تیار ہیں اور کانگریس قائد راہول گاندھی کی قیادت میں کام کرنے کے لئے آمادہ ہیں۔م