ممبئی: نیشنلسٹ کانگریس پارٹی (این سی پی)کے ترجمان اور مہاراشٹر کے وزیر نواب ملک نے منگل کو نارکوٹکس کنٹرول بیوروکے زنل ڈائرکٹر سمیر وانکھیڈے کے برتھ سرٹیفکیٹ پر سوالات اٹھائے ہیں۔ملک نے میڈیا سے بات چیت میں کہا کہ سمیر وانکھیڈے ایک مسلمان کمیونٹی میں پیدا ہوئے اور انہوں نے ایک مسلم لڑکی ڈاکٹر شبانہ سے شادی کی۔بعد میں وانکھیڈے نے کرانتی ریڈکر نامی لڑکی سے شادی کرلی تاکہ وہ شیڈیول کاسٹ کو ملنے والی سرکاری اسکیموں کا فائدہ اٹھاسکیں۔ انہوں نے اپنی ذات تک بدل لی اور غریب لوگوں اور مستحقین کے حقوق غصب کرلیے ۔ ملک نے یہ بھی دعویٰ کیا کہ وانکھیڈے دو پرائیویٹ افراد کی مدد سے معروف شخصیات کے فون ٹیپ کرتے تھے اور معصوم وبے قصورلوگوں کو بلیک میل کیا کرتے تھے ۔ این سی پی کے وزیر نے کہا کہ ان کے پاس تمام پرائیویٹ لوگوں کے شواہد، ان کے نام و پتے موجود ہیں اور کسی مناسب وقت پر اس کا انکشاف کریں گے ۔