حیدرآباد 22 اگست (یو این آئی) ایک المناک سڑک حادثہ میں دو افراد جھلس کر ہلاک ہوگئے ۔یہ حادثہ اے پی کے ضلع وجیانگرم کے گڈی واڑہ جنکشن کے قریب اُس وقت پیش آیا جب ٹہری ہوئی لاری کو پیچھے سے ایک اور لاری نے ٹکر دے دی۔حادثہ اتنا خطرناک تھا کہ ایک لاری کا ڈرائیور اور کلینر جھلس کر موقع پر ہی ہلاک ہوگئے ۔یہ حادثہ جمعرات کو صبح کی اولین ساعتوں میں پیش آیا۔مقامی افراد اور پولیس نے بتایا کہ جمعرات کی صبح ضلع کے گڈی واڑہ دیہات کی 26ویں قومی شاہراہ پر ٹہری ہوئی لاری کو وشاکھاپٹنم سے پاروتی پورم کمیکل کے لوڈ کے ساتھ جانے والی لاری نے ٹکر دے دی جس پر کمیکل کی لاری شعلہ پوش ہوگئی۔اس میں موجود مدھیہ پردیش کا ڈرائیور 40سالہ رام چندر یادو اور کلینر30سالہ پرکاش سنگھ زندہ جھلس کر ہلاک ہوگئے ۔اس حادثہ کے نتیجہ میں صبح تقریبا 3بجے تا 6بجے کے درمیان اس شاہراہ پر گاڑیوں کی آمد ورفت میں خلل پڑا۔مقامی افراد نے اس حادثہ کی اطلاع پولیس کو دی جس کے بعد پولیس فوری طورپر وہاں پہنچی اور گاڑیوں کی آمد ورفت کو بحال کیا۔پولیس نے تفصیلات حاصل کرتے ہوئے لاشوں کو پوسٹ مارٹم کے لئے بھیج دیا اور اس سلسلہ میں ایک معاملہ درج کرلیا۔