ملبورن۔9 مارچ (سیاست ڈاٹ کام)ہندوستان او آسٹریلیاکے درمیان ملبورن میں کھیلے گئے ویمنس ٹی20 ورلڈکپ کے فائنل میں شائقین نے نیا عالمی ریکارڈ قائم کردیا جبکہ میزبان ٹیم نے پانچویں مرتبہ چمپیئن کا اعزاز حاصل کیا۔آسٹریلیا کے مشہورومعروف میدان ملبورن کرکٹ گراؤنڈ میں کھیلے گئے ویمنس ٹی20 کے فائنل میں آسٹریلیا کا مقابلہ ہندوستان سے تھا۔چار مرتبہ کی دفاعی چمپیئن آسٹریلیا نے خواتین کے عالمی دن کومزید یادگار بناتے ہوئے ویمنس ٹی20 ورلڈکپ پانچویں بارجیت لیا۔ میچ کی سب سے خاص بات تماشائیوں سے کھچا کھچ بھرا میلبورن کرکٹ گراؤنڈ تھا جس میں خصوصاً خواتین تماشائیوں نے بھرپور تعداد میں شرکت کر کے نیا عالمی ریکارڈ بنا دیا۔ ملبورن کرکٹ اسٹیڈیم میں کھیلے گئے میچ کو دیکھنے کے لیے 86 ہزار 174شائقین موجود تھے جو ایک نیا عالمی ریکارڈ ہے۔ یہ ناصرف آسٹریلیا میں کھیلے گئے خواتین کے کسی بھی کھیلوں کے مقابلوں میں شرکت کرنے والے شائقین کی سب سے بڑی تعداد ہے بلکہ یہ اب تک ویمن کرکٹ کے دنیا بھر میں کھیلے گئے تمام میچوں میں شرکت کرنے والے شائقین کی سب سے بڑی تعداد ہے۔ خواتین کے کھیلوں کے مقابلوں میں شائقین کی سب سے بڑی تعداد میں شرکت کا ریکارڈ 1999 میں قائم ہوا تھا جب امریکہ اور روس کے درمیان ویمنس فٹبال ورلڈ کپ کے فائنل میں90ہزار185افراد نے اسٹیڈیم میں میچ دیکھا تھا۔ علاوہ ازیں میزبان اوپنر الیسا ہیلی نے 30 گیندوں میں جو نصف سنچری مکمل کی وہ بھی ایک ریکارڈ ہے کیونکہ وہ آئی سی سی کے کسی ایونٹ جوکہ مرد اور خواتین دونوں کا ہو اس میں تیزرفتار نصف سنچری بنانے کا ریکارڈ قائم کیا ۔ ہیلی کی نصف سنچری فائنل میں بنائی جانے والی سب سے تیز ترین نصف سنچری کا ایک نیا ریکارڈ ہے۔اتوار کو کھیلے گے ٹی20 ورلڈ کپ کے فائنل میں ہندوستان کو آسٹریلیا کے خلاف 85 رنز کی شکست برداشت کرنی پڑی۔