دبئی ۔9 جولائی (سیاست ڈاٹ کام ) ورلڈ کپ 2019 اختتامی مرحلے میں داخل ہو چکا ہے اور رواں ہفتے دنیائے کرکٹ کو عالمی چمپیئن مل جائے گا لیکن ورلڈکپ کے اختتام کے باوجود اس کے یادگار لمحات ایک عرصے تک شائقین کرکٹ کو یاد رہیں گے۔ٹورنمنٹ کے دوران لئے گئے ناقابل فراموش کیچز ہیں جس پر دنیا بھر کے شائقین دنگ رہ گئے۔ ورلڈکپ کے دوران کئی شاندار کیچز لیے گئے جن میں سے چند سرفہرست کیچوں کی بات کی جائے تو پہلے ہی میچ میں انگلینڈ کے بین اسٹوکس نے جنوبی افریقہ کے وکٹ کیپر کوئنٹن ڈی کوک کا شاندار کیچ لے کر سب کو حیران کردیا۔ اس کیچ کی خاص بات یہ تھی کہ انگلش آل راؤنڈر نے محض ایک ہاتھ گیند کو پکڑنے کے لیے استعمال کیا۔ پاکستان اور انگلینڈ کے درمیان میچ میں امام الحق کی جانب سے کھیلا گیا شاٹ شاید کسی اور ٹیم کے خلاف کھیلا گیا ہوتا تو چوکا ہو جاتا لیکن کرس ووکس نے شاندار کاوش کے ذریعے بہترین کیچ لے کر پاکستانی اوپنر کی اننگز کا خاتمہ کردیا۔جنوبی افریقہ کی ٹیم ورلڈ کپ میں کچھ خاص کارکردگی نہ دکھا سکی لیکن اپنی بہترین فیلڈنگ کے لیے دنیا بھر میں مشہور افریقی ٹیم نے اس شعبے میں شائقین کو زیادہ مایوس نہ کیا اور ہندوستان کے خلاف وکٹ کیپر کوئنٹن ڈی کوک نے ویراٹ کوہلی کا شاندار کیچ لے کر ہر خاص و عام سے داد وصول کی۔اسی طرح پاکستان کے خلاف میچ میں عمران طاہر نے اپنی ہی گیند پر ایک بہترین کیچ لیا اور اس مرتبہ بھی بدقسمت بیٹسمین امام الحق ہی تھے۔ویسٹ انڈیز ٹیم کی کارکردگی بھی جنوبی افریقہ سے کچھ مختلف نہ تھی لیکن ایونٹ میں سب سے لمبے چھکے لگانے کے ساتھ ساتھ ویسٹ انڈیز کھلاڑیوں نے چند شاندارکیچ بھی لیے جن میں شیلڈن کوٹریل کاکیچ سرفہرست ہے۔ آسٹریلیا کے سابق کپتان اسٹیون اسمتھ نے ویسٹ انڈیزکے خلاف عمدہ اننگز کھیل کر اپنی ٹیم کو مکمل تباہی سے بچایا اور وہ سنچری کی جانب گامزن تھے لیکن ان کی جانب سے ماراگیا ایک شاٹ حیران کن طور پر اننگز کا خاتمہ کر گیا۔اگر اس وقت کوٹریل کے علاوہ کوئی اورکھلاڑی وہاں موجود ہوتا تو شاید یہ باآسانی چھکا ہو جاتا لیکن ویسٹ انڈیز بولر نے باؤنڈری پر بھاگتے ہوئے ایک ہاتھ سے کیچ پکڑ کر اسمتھ کو پویلین واپسی پر مجبور کردیا۔مارٹن گپٹل اس ورلڈ کپ میں انتہائی بری فارم کا شکار ہیں اور آسٹریلیا کے خلاف میچ میں انہوں نے ابتدا ہی میں دو اہم کیچ گرا دیے لیکن پھر اس خراب فیلڈنگ کا ازالہ کرتے ہوئے ایک ناقابل یقین کیچ لے لیا۔ لوکی فرگیوسن کی گیند پر اسٹیون اسمتھ نے گیند کو باؤنڈری کی جانب پل کرنے کی کوشش کی لیکن شارٹ لیگ پر کھڑے گپٹل نے ناقابل یقین کیچ لے کر اسمتھ سمیت میدان میں موجود تمام افراد کو حیران کردیا تاہم اسمتھ نے اس کیچ کا بدلہ لینے میں دیر نہ کی اور نیوزی لینڈ کی اننگز میں گپٹل کی طرح یکساں مہارت کا ثبوت دیتے ہوئے اسٹارک کی گیند پر ٹام لیتھم کی اننگز کا خاتمہ کردیا۔اگر دنیا کے چند بہترین فیلڈرز کا ذکر کیا جائے تو ہندوستانی کھلاڑی رویندرا جڈیجہ کا نام فوری ذہن میں آتا ہے اور اس ورلڈ کپ میں مواقع نہ ملنے کے باوجود بھی وہ ورلڈ کپ اپنا کام کر گئے۔میزبان انگلینڈ کے خلاف میچ میں جب جیسن روئے اور جونی بیئراسٹو کی شراکت توڑنے میں ہندوستانی بولرس بالکل بے بس نظر آرہے تھے تو ایسے موقع پر جڈیجہ نے روئے کا شاندار کیچ لے کر اس شراکت کا خاتمہ کیا اور اپنی ٹیم کو اہم کامیابی دلائی۔ افغانستان اور ویسٹ انڈیز کا میچ کچھ خاص اہمیت کا حامل نہ تھا کیونکہ دونوں ہی ٹیمیں پہلے ہی سیمی فائنل کی دوڑ سے باہر ہو چکی تھیں لیکن فیبیئن ایلن کے شاندار کیچ کی وجہ سے شائقین اس میچ کو بھی یاد رکھیں گے۔ پاکستانی ٹیم کیچ چھوڑنے میں سرفہرست رہی لیکن کپتان سرفراز احمد کی بدولت پاکستان کی ٹیم بھی بہترین کیچز کی فہرست میں جگہ بنانے میں کامیاب رہی۔
