لاہور: آئی سی سی ٹی 20 ورلڈکپ میں بطور کپتان ناقص پرفارمنس کے بعد اطلاعات ہیں کہ پاکستان کرکٹ بورڈ نے بنگلہ دیش کے خلاف 2 ٹسٹ پر مشتمل ہوم سیریز میں بابر اعظم کو کپتانی سے دور رکھنے کا فیصلہ کیا ہے۔ چیئرمین پی سی بی محسن نقوی نے7 ارکان پر مشتمل سلیکشن کمیٹی کی تجویز پر شاہین آفریدی کی جگہ ٹی ٹوئنٹی ٹیم کی قیادت بابراعظم کے سپرد کرتے ہوئے انہیں 2025 چمپئنز ٹرافی تک وائٹ بال ٹیم کی قیادت دی تھی۔ توقع تھی کہ بورڈ بنگلہ دیش کے خلاف انہیں 2 ٹسٹ کی سیریز قیادت دینے کا ارادہ رکھتا تھا جب کہ 2 ٹسٹ کی سیریز آئی سی سی ٹسٹ چمپئن شپ کا حصہ ہے۔ تاہم ورلڈکپ میں ناقص پرفارمنس کے بعد اب بورڈ نے ٹسٹ ٹیم کی قیادت کیلئے بابراعظم کے نام کو زیر غور لانے کے بجائے شان مسعود پر ہی اعتماد رکھنے کا فیصلہ کیا ہے۔ بتایا جارہا ہے کہ آسٹریلیا کے سابق فاسٹ بولر جیسن گلیسپی کو شان مسعود کے ساتھ ٹسٹ ٹیم کے کوچ کی ذمہ داری سونپی جائے گی۔
