میلبورن۔17اپریل (سیاست ڈاٹ کام) آسٹریلیا میں اس سال اکتوبر نومبر میں ہونے والے ٹی 20 ورلڈ کپ کے بارے میں صورتحال اگلے ماہ واضح ہو پائے گی۔کورونا وائرس کی وجہ سے دنیا بھر میں کرکٹ سرگرمیاں ٹھپ پڑی ہوئی ہیں اور بہت سے ممالک میں سفر پر پابندی ہے۔ ایسے میں 18 اکتوبر سے آسٹریلیا میں ہونے والے ٹی 20 ورلڈ کپ پر خطرہ منڈلارہا ہے۔کورونا کی وجہ سے ہندوستان میں انڈین پریمیئر لیگ کو غیر معینہ مدت کے لئے ملتوی کر دیا گیا ہے۔فی الحال ابھی تک ایسا نہیں ہے کہ 18 اکتوبر سے 15 نومبر تک ہونے والا ورلڈ کپ ملتوی ہو سکتا ہے لیکن کورونا کا خطرہ جس طرح دنیا میں پھیلا ہوا ہے اسے دیکھتے ہوئے ایسا خدشہ ظاہر کیا جا رہا ہے۔ منتظمین کو امید ہے کہ ورلڈ کپ کے متعلق اگلے ماہ تصویر واضح ہو جائے گی جب بین الاقوامی کرکٹ کونسل (آئی سی سی) باقاعدگی سے اپنے اجلاس کرے گی جسے مارچ میں ملتوی کر دیا گیا تھا۔ایسے قیاس لگائے جا رہے ہیں کہ کورونا کے خطرے کو دیکھتے ہوئے ٹی 20 ورلڈ کپ کو ناظرین کے بغیر خالی اسٹیڈیم میں کیا جا سکتا ہے لیکن آسٹریلیا کو پہلی بار اپنی کپتانی میں 1987 میں عالمی کپ جتانے والے ایلن بارڈر نے کہا ہیکہ ناظرین کے بغیر ٹی 20 ورلڈ کپ کروانے کے بارے میں وہ تصور بھی نہیں کرسکتے۔64 سالہ بارڈر نے کہا تھاکہ آپ کے پاس دو اختیارات ہیں، یا تو آپ اسے صحیح طریقے سے منعقد کریں جس میں ناظرین بھی شامل ہوں نہیں تو ٹورنمنٹ کو منسوخ کر دیں۔ بارڈر سے پہلے آسٹریلیا کے آل راونڈر گلین میکسویل نے بھی کہا کہ ٹی 20 ورلڈ کپ کو ناظرین کے بغیر منعقد نہیںکیا جا سکتا ہے۔آئی سی سی اور کرکٹ آسٹریلیا کے اختیارات پر غورکر رہے ہیں لیکن فی الحال ٹورنمنٹ کے اپنے طے پروگرام کے مطابق ہونے کا امکان ہے۔
