کنگز ٹاؤن (ویسٹ انڈیز): آئی سی سی ٹی ٹوئنٹی ورلڈ کپ میں آج ہفتہ کے پہلے میچ میں سنسنی خیز مقابلے کے بعد جنوبی افریقہ نے نیپال کو محض 1 رن سے شکست دی۔ ورلڈ کپ کے 31 ویں میچ میں نیپال نے جنوبی افریقہ کے خلاف ٹاس جیت کر پہلے فیلڈنگ کا فیصلہ کیا۔ نیپال کے خلاف پہلے بیٹنگ کرتے ہوئے جنوبی افریقہ نے7 وکٹوں کے نقصان پر115 رنز اسکور کیے۔ جنوبی افریقہ کے ریزا ہینڈریکس نے 43 رنز کی ذمہ دارانہ اننگز کھیلی۔ ان کے علاوہ ٹرسٹن اسٹبز نے 27، ایڈن مارکرم 15 اور کوئنٹن ڈی کوک 10 رنز بناسکے۔ ٹیم کا باقی کوئی کھلاڑی دو ہندسہ میں داخل نہ ہوسکا۔ نیپال کی جانب سے کوشل بھڑتل نے 4، ڈیپندرا سنگھ نے 3 وکٹیں حاصل کئے۔ جنوبی افریقا کے مقررہ 116 رنز کے ٹارگٹ پر نیپال کے اوپنر آصف شیخ نے ذمہ دارانہ بیٹنگ کا مظاہرہ کرتے ہوئے 49 گیندوں پر 1 چھکے اور چار چوکوں کی مدد سے 42 رنز کی عمدہ اننگز کھیلی۔ انیل شاہ 27، کوشل بھڑتل 13 اور سومپل کامی 8 رنز بنا سکے۔ نیپالی بیاٹرز نے اچھا مظاہرہ کرتے ہوئے کھیل کو سنسنی خیز بنادیا اور میچ کا فیصلہ آخری گیند تک لے گئے۔ تاہم ٹارگٹ کے دفاع میں جنوبی افریقہ کے اسپنر تبریز شمسی نے 19 رنز دے کر 4 کھلاڑیوں کو پویلین روانہ کیا۔ اینرخ نوکیا اور مارکرم نے ایک، ایک وکٹ حاصل کی۔ نیپال 20 اوورز میں 114/7 تک محدود رہا اور تاریخی کامیابی سے چوک گیا۔ اس نتیجہ کے ساتھ گروپ ڈی میں سری لنکا اور نیپال ٹورنمنٹ سے باہر ہوگئے ہیں۔ تین میچز میں کامیابی کے ساتھ جنوبی افریقہ کی ٹیم سوپر 8 مرحلے کیلئے کوالیفائی کر چکی ہے۔ اس گروپ میں بنگلہ دیش اور نیدرلینڈز کا میچ باقی ہے جس سے سوپر 8 مرحلے کیلئے گروپ D کی دیگر ٹیم کا فیصلہ ہوجائے گا۔ آج کا دوسرا میچ گروپ C میں نیوزی لینڈ اور یوگنڈا کی ٹیموں کے درمیان کھیلا گیا جس میں نیوزی لینڈ نے یکطرفہ مقابلے کے بعد فتح اپنے نام کرلی۔ یوگنڈا 40 پر آل آؤٹ ہوگیا جس کے جواب میں نیوزی لینڈ نے 5.2 اوورز میں 41/1 کے ساتھ میچ جیت لیا۔ آج کا تیسرا میچ بھارت اور کینیڈا کے درمیان جبکہ چوتھا میچ انگلینڈ اور نمیبیا کے درمیان کھیلا جائے گا۔
