ہوسٹن: بولروں کی شاندار کارکردگی کے بعد کوری اینڈرسن (34) اور ہرمیت سنگھ (33) کی ناٹ آؤٹ طوفانی بیٹنگ کی بدولت امریکہ نے ٹی20 میچ میں بنگلہ دیش کو پانچ وکٹوں سے شکست دے دی۔ اس کے ساتھ ہی امریکہ نے تین میچوں کی سیریز میں 1-0 کی برتری حاصل کر لی ہے۔ ٹی20 ورلڈ کپ سے قبل امریکی ٹیم نے تین میچوں کی سیریز کے پہلے میچ میں تاریخی فتح حاصل کی۔ امریکہ کی جیت کے ہیرو ہرمیت سنگھ نے 13 گیندوں پر 33 رنزکی دھماکہ خیز اننگز کھیلی۔ 157 رنزکے ہدف کے تعاقب میں امریکہ کی شروعات اچھی نہیں رہی اور چوتھے اوور میں ہی رن آؤٹ کی صورت میں کپتان مونک پٹیل (12) کی وکٹ گنوا بیٹھی۔ اس کے بعد نویں اوور میں آندریاس گاس 18 گیندوں پر23 رنز بنانے کے بعد آؤٹ ہو ئے۔ اسٹیون ٹیلر20 رنز بنانے کے بعد آؤٹ ہوئے۔ آرون جونز (4) اور نتیش کمار (10) رنز بنانے کے بعد آؤٹ ہوئے۔ کوری اینڈرسن اور ہرمیت سنگھ نے امریکی ٹیم کو سنبھالاجو 94 کے اسکور پر پانچ وکٹیں گنوانے کے بعد مشکلات میں گھری ہوئی تھی۔ اینڈرسن 25 گیندوں میں ناٹ آؤٹ (34) اور ہرمیت نے 13 گیندوں میں (33) دو چوکے اور تین چھکے لگا کر ناٹ آؤٹ رہے۔ دونوں نے طوفانی بیٹنگ کرتے ہوئے 19.3 اوورز میں 156 رنز بنائے اور اپنی ٹیم کو پانچ وکٹوں سے تاریخی فتح دلائی۔ بنگلہ دیش کی جانب سے مستفیض الرحمان نے دو وکٹیں حاصل کیں۔ شرف الاسلام اور رشاد حسین نے فی کس ایک بیٹرکو آؤٹ کیا۔قبل ازیں امریکہ نے ٹاس جیت کر پہلے بولنگ کا فیصلہ کیا تھا۔ بنگلہ دیش کی اوپننگ جوڑی لٹن کمار داس اور سومیا سرکار نے پہلی وکٹ کے لیے 34 رنز بنائے۔ پانچویں اوور میں جسدیپ نے لٹن کو ایل بی ڈبلیو کرکے پویلین بھیج دیا۔ سومیا سرکار بھی چھٹے اوور میں آوٹ ہوئے۔ انہیں اسٹیون ٹیلر نے آؤٹ کیا۔ توحید ہردوئی نے 47 گیندوں پر 58 رنز کی اننگز کھیلی جس میں چار چوکے اور دو چھکے شامل ہیں۔ محمود اللہ (31) ، سومیا سرکار (20) اور لٹن داس (14) رنز بنانے کے بعد آؤٹ ہوئے۔ امریکہ کی جانب سے اسٹیون ٹیلر نے دو وکٹیں حاصل کیں۔ علاوہ ازیں سوربھ، علی اور جیسی نے فی کس ایک وکٹ حاصل کی۔ دونوں ٹیموں کے درمیان سیریز کا دوسرا میچ جمعرات کو ہوسٹن میں کھیلا جائے گا۔
