لندن ۔27 جون (سیاست ڈاٹ کام ) ہندوستان اور پاکستان کے درمیان کرکٹ کا میچ انتہائی دلچسپ اور ہائی وولٹیج ہوتا ہے اور اگر وہ مقابلہ ورلڈ کپ کا سیمی فائنل ہو تو پھر اس کے دلچسپی کا اندازہ لگانا بھی کافی مشکل ہوجاتا ہے۔ رواں ورلڈ کپ میں دونوں ٹیمیں ایک مرتبہ آمنے سامنے آچکی ہیں اور اس مقابلے میں ہندوستان نے 89 رنز کی کامیابی حاصل کی تھی لیکن دونوں ٹیموں کے ایک مرتبہ پھر آمنے سامنے ہونے کا امکان پیدا ہوتا ہوا نظر آرہا ہے اور اگر ایسا ہوتا ہے تو پاکستانی ٹیم دوسری مرتبہ ہندوستان کا سامنے کرے گا۔ پہلے جنوبی افریقہ اور پھر نیوزی لینڈ کے خلاف پاکستان نے جس طرح کا مظاہرہ کیا ہے اس سے واضح طور پر نظرآرہا ہے کہ کافی کچھ بدل گیا ہے اور اگر وہ اپنے باقی دونوں میچ اسی طرح سے جیت لیتی ہے تو وہ گروپ میں چوتھے نمبر پر آسکتی ہے اور پھر ہندوستان اور پاکستان کی ٹیمیں ایک مرتبہ پھر آمنے سامنے ہوسکتی ہیں۔پوائنٹس ٹیبل پر نیوزی لینڈ کو شکست دینے کے بعد پاکستان 7 پوائنٹس کے ساتھ چھٹے نمبر پر پہنچ گئی ہے۔
پہلے نمبر پر آسٹریلیا ، دوسرے پر نیوزی لینڈ ، تیسرے پر ہندوستان اور چوتھے پر انگلینڈ ہے تاہم انگلینڈ کے پاس 7 میچوں میں 8 پوائنٹس ہیں اور اگر وہ باقی دو میچوں میں سے کوئی میچ ہارتا ہے تو سیمی فائنل میں پہنچنا اس کیلئے مشکل ہوجائے گا۔ انگلینڈ کیلئے مشکل یہ ہے کہ اس کے باقی دو میچ ہندوستان اور نیوزی لینڈ کے خلاف ہیں ، جس میں صد فیصد کامیابی حاصل کرنا اتنا آسان نہیں ہوگا اور اگر وہ دونوں میچ جیت جاتا ہے تو اس کے 12 پوائنٹس ہوجائیں گے اور سیمی فائنل میں پپہنچ جائے گا۔ تاہم اگر کسی ایک میچ میں اس کو شکست ہوتی ہے تو پھر اس کے پاس 10 پوائنٹس ہی ہوں گے اور سیمی فائنل میں پہنچنا مشکل ہوجائے گا۔ وہیں 7 میچوں میں پاکستان کے پاس 7 پوائنٹس ہیں لیکن تھوڑی راحت کی بات یہ ہے کہ اس کے باقی میچز افغانستان اور بنگلہ دیش سے ہیں۔ پاکستان اگر دونوں میچ جیت جاتا ہے تو پھر اس کے 11 پوائنٹس ہوجائیں گے اور انگلینڈ کے ایک میچ گنوانے کے بعد سیمی فائنل میں اس کے پہنچنے کا امکان بڑھ جائے گا۔ علاوہ ازیں اگر ہندوستان سبھی میچ جیت کر پوائنٹس ٹیبل میں پہلا نمبر پر رہتا ہے اور پاکستان چوتھے مقام پر آتا ہے ، تو پھر سیمی فائنل میں ہندوستان اور پاکستان کے درمیان میچ ہوسکتا ہے۔ قوانین کے مطابق پہلے مقام کی ٹیم کا سامنا چوتھے مقام پر رہنے والی ٹیم کے ساتھ ہوتا ہے جبکہ دوسری مقام پر رہنے والی ٹیم کا میچ تیسرے مقام کی ٹیم سے ہوگا اور ان اعداد شمار کے اعتبار سے رواں ورلڈ کپ میں ہندوستان اور پاکستان کے ایک اور مقابلے کی امید کی جاسکتی ہے۔
زخمی عادل رشید کی
ہندوستان کے خلاف شرکت غیر یقینی
لندن ۔27 جون (سیاست ڈاٹ کام ) انگلش اسپنر عادل رشید کی کاندھے میں سوجن کے باعث اتوار کو ہندوستان کیخلاف ورلڈ کپ میچ میں شرکت پر سوالیہ نشان ہے ۔ ٹیم کے ترجمان کے مطابق وہ رواں سیزن کے دوران انجکشن لگا کر میچز کھیلتے رہے ہیں اور آئندہ چند دنوں میں ان کی حالت کا جائزہ لے کر میچ میں دستیابی ممکن بنائی جائے گی۔ جوفرا آرچر نے اگرچہ فٹنس ٹسٹ کامیاب کرلیا تاہم ان کی تکلیف پر بھی نظر رکھی جائے گی۔