ورنگل۔16 ڈسمبر ۔ ( سیاست ڈسٹرکٹ نیوز ) میناریٹی انٹلکچول فورم اور شانتی سنگم ورنگل کی جانب سے ہنمکنڈہ میں صدر ڈاکٹر انیس احمد صدیقی کی صدارت میں ایک خصوصی اجلاس کا انعقاد عمل میں آیا۔ اس اجلاس میں رکن اسمبلی ورنگل ویسٹ نائنی راجندر ریڈی نے بحیثیت مہمان خصوصی شرکت کی۔بعد ازاں کانگریس حکومت کے دوسالہ کارکردگی اور اقلیتوں کے مسائل پر تفصیلی تبادلہ خیال کیا گیا۔ اس موقع پر تنظیموں کے ذمہ داروں کی جانب سے ایم ایل اے کو مسائل پر مبنی ایک یادداشت پیش کی جس میں کہا گیا کہ انتخابات سے قبل مسلمانوں کو سب پلان فراہم کرنے کی بات کہی گئی تھی اس پر عمل آوری کی جائے ،ورنگل کے وقف جائیدادوں کا تحفظ کیا جائے ، ٹمریس اسکول و کالجس میں اقلیتی طلباء کو خصوصی موقع فراہم کیا جائے اور دیگر مذاہب کے طلباء کو ان تناسب کے حساب سے داخلہ فراہم کیا جائے۔ میونسپل کارپوریشن انتخابات میں شہر ورنگل میں کم از کم 6مسلمانوں کو ٹکٹ دینے کے ساتھ ساتھ میئر کا عہدہ بھی مسلمان کو فراہم کیا جائے۔ جرنلسٹ حضرات کو فوری طور پر اراضیات مختص کی جائیں ،اردو میڈیم سرکاری اسکولس میں ٹیچرس کے پوسٹ کو روسٹر سسٹم کی وجہ روکا گیا ہے اس کو ختم کیا جاے۔اردو میڈیم میں ایس سی ،ایس ٹی نہیں پائے جاتے جس کی وجہ سے 800پوسٹ رکے ہوئے ہیں اردو سے وابستہ اساتذہ کی بھرتی عمل میں لائی جائے۔اسی طرح کاکتیہ یونیورسٹی کے ایگزیکیٹیو کونسل میں ایک مسلم فرد کو شامل کیا جائے۔ اسٹیٹ ایجوکیشن کمیٹی تشکیل دی گئی اس میں ایک مسلمان کو شامل کیا جائے۔اسی طرح اینوگولہ گڈہ قبرستان کمیٹی کو تشکیل دیا جائے اور بائونڈری وال کے لئے فنڈز الاٹ کئے جائیں اور غیر مجاز قبضوں کو برخواست کرنے کے اقدامات کئے جائیں۔النکار قبرستان میں غسل خانہ کی تعمیر جو زیر التواء ہے ان کاموں کو مکمل کیا جائے اور آوارہ کتوں کے سد باب کے لئے اقدامات کئے جائیں، وقف بورڈ ،اردو اکیڈیمی ،حج کمیٹی ،میناریٹی فینانس کارپوریشن ،میناریٹی کمیشن میں اضلاع کے لوگوں کو ممبر کی حیثیت سے نامزد کیا جائے ، اور دیگر مسائل شامل ہیں۔اس موقع پر ایم ایل اے تمام باتوں کو بغور سماعت کیا اور اس کی یکسوئی کا تیقن دیا۔اس موقع پر سابق کارپوریٹر محمد ابوبکر ایڈوکیٹ ،مسعود مرزا محشر ،ایم اے کلیم ، پروفیسر مصطفی ،سید محی الدین ، سید اکبر ، شیخ امجد ،محمد سراج احمد صدر مسلم و یلفیر سوسایٹی ورنگل ،خسرو سلیم ، ایم اے نعیم جر نلسٹ اور دیگر کے علاوہ نصرت جہاں ،محسن سلطانہ ،نازنین ،نور جہاں بیگم ،تسلیم بیگم نجمعہ سلطانہ ،پروین بیگم ،کوثر فاروقی اور دیگر لوگ موجود تھے۔