دنیا کی بلند ترین سرنگ کے لیے پہلا دھماکہ کریں گے
نئی دہلی/ سری نگر : وزیر اعظم نریندر مودی 25 ویں کارگل وجے دیوس کے موقع پر جمعہ کو کارگل خطے کا دورہ کریں گے اور اس دورے کے دوران وہ لداخ خطے میں ویڈیو کانفرنسنگ کے ذریعے دنیا کے بلند ترین شنکن لا ٹنل پروجیکٹ کا پہلا دھماکہ کریں گے۔ وزیر اعظم کے دفتر سے جاری ایک ریلیز کے مطابق مودی کل صبح تقریباً 9:20 بجے کارگل وار میموریل کا دورہ کریں گے ۔ وہ کارگل جنگ کے دوران اپنی جانوں کا نذرانہ پیش کرنے والے شہداء کو خراج عقیدت پیش کریں گے ۔شنکن لا ٹنل پروجیکٹ میں 4.1 کلومیٹر طویل ڈبل ٹنل سسٹم بنایا جائے گا۔ یہ سرنگ نیمو۔پدم۔درچہ روڈ پر تقریباً 15,800 فٹ کی اونچائی پر بنائی جا رہی ہے اور اس سے لیہہ کے لیے ہر موسم میں ٹریفک کی سہولت ہوگی۔حکومت کا کہنا ہے کہ شنکن لا ٹنل مسلح افواج اور آلات کی تیز رفتار اور موثر نقل و حرکت کو یقینی بنائے گی، لیکن لداخ میں اقتصادی اور سماجی ترقی کو بھی فروغ دے گی۔ واضح رہے کہ 1999 ء میں پاکستانی فوجیوں اور کئی گروپوں کے دہشت گردوں نے اسٹریٹجک سری نگر لیہہ ہائی وے پر لائن آف کنٹرول (ایل او سی) کے قریب دراس سے بٹالک سیکٹر تک کی بلندیوں پر قبضہ کر لیا تھا۔ ہندوستانی فوج نے بعد میں ہندوستانی فضائیہ کے ساتھ مل کر ایک بڑا آپریشن شروع کیا اور 74 دن کی لڑائی کے بعد فوج اپنا علاقہ واپس جیتنے میں کامیاب ہوگئی۔ تب سے فوج 26 جولائی کو یوم فتح کے طور پر منا رہی ہے ، جس کی مرکزی تقریب دراس میں ہوتی ہے ۔