نئی دہلی: وزیر اعظم نریندر مودی منگل کو آسیان میں ہندوستان کے اہم شراکت دار برونائی اور سنگاپور کے تین روزہ دورے پر جارہے ہیں۔آج یہاں ایک پریس کانفرنس میں وزیر اعظم کے دورہ کے بارے میں معلومات دیتے ہوئے وزارت خارجہ میں سکریٹری (ایسٹ) جے دیپ مجمدار نے کہا کہ وزیر اعظم نریندر مودی سلطان حاجی حسنال بولکیہ کی دعوت پر 3 اور4ستمبر کے دوران دارالسلام (برونائی ) کا دورہ کریں گے ۔ اس کے بعد وہ سنگاپور کے وزیراعظم لارنس وونگ کی دعوت پر 4 اور 5ستمبر کو سنگاپور جائیں گے ۔مجمدار نے کہا کہ مودی کا برونائی کا دورہ کسی ہندوستانی وزیر اعظم کا پہلا باہمی دورہ ہوگا۔ دورے کے دوران وزیراعظم برونائی کے ساتھ ہمارے باہمی تعلقات اور تعاون کے تمام پہلوؤں پر بات چیت کریں گے اور تعاون کے نئے شعبوں کا بھی جائزہ لیں گے ۔ ہم برونائی کے ساتھ بہت گرمجوشی اور دوستانہ تعلقات رکھتے ہیں اور ہماری بات چیت میں دفاع، تجارت اور سرمایہ کاری، توانائی، خلا، ٹیکنالوجی، صحت، صلاحیت کی تعمیر، ثقافت اور دونوں ممالک کے لوگوں کے درمیان متحرک تبادلے جیسے کئی معاملے شامل ہیں۔ برونائی میں ہندوستانی باشندوں کی تعداد تقریباً 14 ہزار ہے اور ان میں ڈاکٹروں اور اساتذہ کی ایک بڑی تعداد شامل ہے جنہوں نے برونائی کی معیشت اور معاشرے میں اپنے تعاون کیلئے خیر سگالی اور احترام حاصل کیا ہے ۔انہوں نے کہا کہ ہمیں اپنے خلائی پروگرام میں برونائی سے قابل قدر تعاون حاصل ہوا ہے ۔ ہم نے برونائی میں سال 2000 میں ایک ٹیلی میٹری ٹریکنگ اور کمانڈ اسٹیشن قائم کیا تھا۔ یہ سیٹلائٹ اور سیٹلائٹ لانچ گاڑیوں کے ہمارے ماضی کے تمام لانچوں کی نگرانی کرتا ہے ۔ دفاعی شعبہ ہمارے دوطرفہ تعاون کا ایک اور اہم ستون ہے ۔ ہمارے پاس دفاع پر ایک ایم او یو ہے ، جس پر 2016 میں دستخط ہوئے تھے اور 2021 میں اس کی تجدید کی گئی ہے ۔ یہ ہمارے تعاون کیلئے ایک فریم ورک فراہم کرتا ہے جس میں اعلیٰ سطح پر باقاعدہ تبادلے ، بحری اور کوسٹ گارڈ شپ ایکسچینز دورے ، ٹریننگ اور مشترکہ مشقیں اور ایک دوسرے کی نمائشوں میں شرکت شامل ہے ۔ ہم دفاع کے شعبے میں تعاون کیلئے ایک مشترکہ ورکنگ گروپ کے قیام کی طرف بھی کام کر رہے ہیں۔
