مہاراشٹر میں زعفرانی گروہ بی جے پی اور شیو سینا کے درمیان قربت پھر بڑھنے کے آثار نظر آ رہے ہیں ۔ اورنگ آباد کے ایک پروگرام میں شریک سی ایم ادھو ٹھاکرے نے بی جے پی کے سینئر لیڈر اور وزیر ریل راؤ صاحب دانوے کی طرف دیکھ کر انہیں اپنا سابق اور مستقبل کا ساتھی کہا۔ اس کے جواب میں وزیر راؤ صاحب دانوے نے کہا کہ اگر شیوسینا اور بی جے پی متحد ہوجائیں تو ووٹر خوش ہوجائیں گے۔ دونوں رہنماؤں کے اس بیان کے بعد ریاست میں ایک بار پھر سیاسی ہلچل شروع ہوگئی ہے۔ خیال رہے کہ30 سال تک ایک دوسرے کے ساتھ دامن چولی کے رشتہ کے بعد 2019 میں شیو سینا اور بی جے پی محض سیاسی مفاد کی وجہ سے الگ ہوگئے۔ وزیراعلیٰ ٹھاکرے کے اس بیان کے بعد شیو سینا کے رہنما اور وزیر محصولات عبدالستار نے کہا کہ اگر وزیر اعلیٰ ادھو ٹھاکرے اگلے تین سال تک وزیر اعلیٰ رہیں گے، تو ہم اتحاد کے لیے تیار ہیں۔ انہوں نے مزید کہا کہ اگر دونوں پارٹیاں متحد ہوں گی تو مرکزی اور ریاستی حکومت کے درمیان بہتر تال میل قائم ہوگا
