راہول گاندھی کی پریس کانفرنس
نئی دہلی: کانگریس کے سابق صدر راہول گاندھی نے ہند۔چین نتازعہ پر مرکز اور وزیر اعظم پر سخت حملہ کرتے ہوئے کہا کہ ’’وزیر اعظم بزدل ہیں جو چین کے سامنے کھڑے نہیں ہو پائے۔ وہ ہندوستانی فوج کی قربانیوں کو ختم کر رہے ہیں اور ہندوستان میں ایسا کرنے کی کسی کو اجازت نہیں دی جا سکتی ‘‘۔ راہول گاندھی جمعہ کی صبح ایک پریس کانفرنس سے خطاب کر رہے تھے۔راہول گاندھی نے پارلیمنٹ میں مشرقی لداخ پر وزیر دفاع راج ناتھ سنگھ کے بیان پر کہا کہ ان کے بیان سے صاف ہو گیا ہے کہ اب ہماری فوج کو ’فنگر 3‘ پر رہنا ہوگا جبکہ ’فنگر 4‘ تک ہماری سر زمین ہے۔ انہوں نے کہا کہ اب ہم فنگر 4 سے فنگر 3 پر آ گئے ہیں۔ راہول گاندھی نے سوال کیا کہ وزیر اعظم نریندر مودی نے ہماری سر زمین چین کو کیوں دے دی؟ انہوں نے کہا کہ وزیر دفاع نے انتہائی اہم خطہ کے بارے میں ایک لفظ بھی نہیں کہا، جیسے ڈیپسانگ پلینس، جہاں سے چین داخل ہوا تھا۔ راہول گاندھی نے کہا کہ ’’حقیقت یہ ہے کہ وزیر اعظم نے ہندوستانی سر زمین چین کو دے دی ہے اور ان کو اس کا جواب ملک کو دینا چاہئے۔‘‘راہول گاندھی مختصر پریس کانفرنس کے بعد فوری طور پر راجستھان کے لئے روانہ ہو گئے لیکن اس دوران ان کے تیور سخت نظر آئے۔ انہوں نے سوال کیا کہ وزیر دفاع کیوں بیان دے رہے ہیں، خود وزیر اعظم آ کر کیوں بیان نہیں دے رہے؟ انہوں نے ایک سوال کے جواب میں کہا ہمارا گھر ہے اور اپنے گھر میں واپس رہنے کو کیسے کامیابی کا نام دیا جا سکتا ہے؟ راہول نے طنز کرتے ہوئے کہا کہ ’’کامیابی یہ ہے کہ وزیر اعظم چین کے آگے جھک گئے ہیں۔‘‘ایک سوال کے جواب میں راہول گاندھی کہا کہ ’’بھارت ماتا کا ٹکڑا فنگر 4 تک تھا جسے چین کو سونپ دیا گیا۔‘‘ راہول گاندھی نے ذرائع ابلاغ سے بھی اپنی ناراضگی کا اظہار کرتے ہوئے کہا کہ میڈیا کیا کر رہا ہے اور جس طرح کے مسئلے ذرائع ابلاغ اٹھا رہا ہے اس پر انہیں حیرانی ہو رہی ہے کیونکہ ایسے اہم مسائل کو اٹھانا چاہئے۔راہول گاندھی نے ایک سوال کے جواب میں کہا کہ اس معاملہ میں کوئی ’گیو‘ اینڈ ’ٹیک‘ یعنی لین دین کا اس لئے سوال نہیں اٹھتا کیونکہ اس میں صرف ’ گیو‘ یعنی دیا گیا ہے کوئی ’ٹیک‘ یعنی لیا نہیں گیا۔
انہوں نے کہا کہ انہیں فوج اور ہندوستانی عوام پر بھروسہ ہے اور یہ معاملہ ایسا نہیں ہے جس پر ملک خاموش بیٹھ جائے گا۔ انہوں نے واضح الفاظ میں کہا کہ ہندوستانی سر زمین کے دفاع کی ذمہ داری وزیر اعظم کی ہے اور وہ اسے کس طرح انجام دیتے ہیں یہ ان کا مسئلہ ہے لیکن ہندوستانی سر زمین دوسرے ملک کو دئے جانے کو کوئی برداشت نہیں کرے گا۔