نئی دہلی: ہندوستان 27 جنوری کو پہلے ہند ۔سطی ایشیا چوٹی کانفرنس کا انعقاد کرے گا۔وزیر اعظم نریندر مودی کی میزبانی میں ورچول توسط سے ہونے والی اس چوٹی کانفرنس میں قزاقستان، جمہوریہ کرغزستان، تاجکستان، ترکمانستان اور ازبکستان کے سربراہان شرکت کریں گے۔ پہلے ان لیڈران کے یوم جمہوریہ کی تقریبات میں مہمان خصوصی کے طور پر آنے کا پروگرام تھا لیکن کووڈ وبا کی صورتحال کو دیکھتے ہوئے اب اس اجلاس کا انعقاد ویڈیو لنک کے توسط سے کیا جائے گا۔ہندوستان اور وسطی ایشیا ئی ممالک کے درمیان سربراہی سطح کا یہ پہلا اجلاس ہوگا جو وسطی ایشیائی ممالک کے ساتھ ہندوستان کی بڑھتی قربتوں کی علامت ہے۔ ہندوستان ان ممالک کو توسیعی ہمسایہ کے طور پر دیکھتا ہے۔ وزیر اعظم نریندر مودی نے سال 2015 میں تمام وسطی ایشیائی ممالک کا تاریخی دورہ کیا تھا، اس کے بعد ان ممالک کے ساتھ دو فریقی اور کثیر فریقی مراحل پر اعلی سطحی روابط میں اضافہ ہوا ہے۔