نئی دہلی ۔19؍جولائی ( ایجنسیز )کانگریس صدر ملکارجن کھرگے نے وزیر اعظم مودی کو ایک بار پھر منی پور تشدد معاملہ پر تنقید کا نشانہ بنایا ہے۔ انھوں نے اپنے ایک بیان میں کہا ہے کہ وزیر اعظم 42 ممالک تو گھوم آئے لیکن ابھی تک منی پور کا دورہ نہیں کیا ہے۔ انھوں نے یہ بیان ہفتہ کے روز کرناٹک کے میسورو میں منعقد ایک جلسۂ عام سے خطاب کرتے ہوئے دیا۔ منی پور میں اب تک حالات تشویشناک ہیں لیکن اس تعلق سے وزیر اعظم مودی نے اب تک کچھ بھی بیان نہیں دیا ہے۔ ان کی اسی خاموشی پر کانگریس صدر نے سوال اٹھایا ہے۔کانگریس صدر کا کہنا ہے کہ منی پور میں ایک سال سے زیادہ وقت سے نسلی تشدد اور عدم استحکام کا ماحول ہے۔ اس سلسلے میں مرکزی حکومت کے کردار پر اپوزیشن پارٹیاں لگاتار سوال اٹھا رہی ہیں لیکن وزیر اعظم کا کوئی جواب نہیں مل رہا ہے۔ وزیر اعظم نے وہاں جا کر لوگوں کی تکلیف بانٹنا ضروری نہیں سمجھا۔کیا منی پور ہندوستان کا حصہ نہیں ہے۔کانگریس صدر نے بی جے پی اور آر ایس ایس پر آئین کو بدلنے کا الزام بھی عائد کیا۔
انھوں نے کہا کہ بی جے پی اور آر ایس ایس آئین کو بدلنا چاہتے ہیں لیکن ملک کی عوام انھیں ایسا کرنے نہیں دے گی۔