نئی دہلی، 17 اگست (یو این آئی) وزیر اعظم نریندر مودی نے آج قومی راجدھانی خطے میں بنیادی ڈھانچے کے دو اہم پراجکٹوں کا افتتاح کیا ، جن میں دوارکا ایکسپریس وے کا دہلی سیکشن اور اربن ایکسٹینشن روڈ-II شامل ہیں۔تقریباً 11,000 کروڑ روپے کی مشترکہ لاگت سے تیار کردہ، یہ راہداری ٹریفک کے ہجوم کو کم کرنے ، سفر کے وقت کو کم کرنے اور دہلی اور قومی راجدھانی خطہ (این سی آر) میں رابطے کو بہتر کرنے کیلئے تیار ہے ۔رسمی افتتاح سے پہلے وزیر اعظم مودی نے ورچوئل طور پر دونوں پراجکٹوں کی پیش رفت کا جائزہ لیا۔ انہوں نے تعمیراتی مزدوروں سے بھی بات چیت کی، اور ملک کے بنیادی ڈھانچے کی ترقی کیلئے ان کی لگن کی ستائش کی۔افتتاحی تقریب میں دہلی کی وزیر اعلیٰ ریکھا گپتا اور ہریانہ کے وزیر اعلیٰ نائب سنگھ سینی بھی موجود تھے ۔دوارکا ایکسپریس وے کے 10.1 کلومیٹر طویل دہلی سیکشن کو تقریباً 5,360 کروڑ روپے کی لاگت سے تیار کیا گیا ہے ۔ یہ سیکشن یشوبھومی، ڈی ایم آر سی بلیو لائن اور اورنج لائن، بجواسن ریلوے اسٹیشن اور دوارکا کلسٹر بس ڈپو کو ملٹی ماڈل کنیکٹیویٹی بھی فراہم کرے گا۔ اس سیکشن میں پیکیج-1 شیو مورتی اسکوائر سے دوارکا سیکٹر-21 میں روڈ انڈر برج تک 5.9 کلومیٹر ہے ۔ اس کا دوسرا پیکیج دوارکا سیکٹر-21 سے دہلی-ہریانہ سرحد تک 4.2 کلومیٹر طویل ہے ۔ یہ اربن ایکسٹینشن روٹ -2 سے براہ راست رابطہ فراہم کرتا ہے ۔
