واشنگٹن /10 فروری ( سیاست ڈاٹ کام ) امریکی وزیر خارجہ مائیک پومپیو تین یورپی ممالک کے دورے کے آغاز پر پیر گیارہ فروری کو ہنگری پہنچ کر وزیر اعظم وکٹور اوربان سے ملاقات کریں گے۔ ایک امریکی اہلکار کے مطابق ہنگری میں قیام کے دوران امریکی وزیر خارجہ ملکی وزیر اعظم کو اْس امریکی تشویش سے بھی آگاہ کریں گے، جو روسی مالی مدد سے ترکی تک تعمیر کی جانے والی گیس پائپ لائن ’ٹرک اسٹریم‘ کے حوالے سے پائی جاتی ہے۔ پومپیو اس دورے کے دوران سلوواکیہ اور پولینڈ بھی جائیں گے۔ یہ تینوں ملک مغربی دفاعی اتحاد نیٹو کے رکن بھی ہیں۔ تجزیہ کاروں کے مطابق وہ اس دورے کے دوران ان ممالک میں بڑھتی ہوئی بے چینی اور روسی اثر و رسوخ پر بھی توجہ مرکوز کریں گے۔
