حیدرآباد: اے پی کے وشاکھااسٹیل پلانٹ کی نجی کاری کے لئے مرکزی بجٹ میں کئے گئے اعلان کے خلاف بائیں بازو کی جماعتوں کی جانب سے راستہ روکو احتجاج کیاگیا۔ وشاکھاپٹنم کے مدیلاپالم علاقہ میں یہ راستہ روکو احتجاجی پروگرام منعقد کیاگیا جس میں بائیں بازو کی جماعتوں کے کارکنوں کی کثیر تعداد نے شرکت کی جنہوں نے مرکز کے اس قدم کے خلاف نعرے بازی کی اور مودی زیرقیادت بی جے پی حکومت سے مطالبہ کیاکہ وہ فوری طورپر اس فیصلہ کو واپس لے ۔انہوں نے کہا کہ کئی طرح کی جدوجہد اور تحریک چلانے کے بعد وشاکھاپٹنم میں اسٹیل پلانٹ قائم کیاگیا۔حکومت، اس تحریک اور قربانیوں کو نظرانداز کرتے ہوئے اس کی نجی کاری کا قدم اٹھارہی ہے جو ناقابل قبول ہے ۔اس احتجاج سے اس علاقہ میں کچھ دیر کے لئے کشیدگی پھیل گئی۔پولیس نے اس موقع پر سی پی آئی کے لیڈروں اور کارکنوں کی بڑی تعداد کو گرفتار کرلیا۔
اس موقع پر پولیس کے ساتھ ان کی بحث وتکرار بھی ہوگئی۔
