بنگلورو ،31جولائی(سیاست ڈاٹ کام)بھارتیہ جنتاپارٹی کے سینئر لیڈر اور چھ بار کے رکن اسمبلی رہے وشیشور ہیگڑے کاگیری کو چہارشنبہ کو اتفاق رائے سے کرناٹک اسمبلی کے اسپیکر منتخب کرلئے گئے ۔ وزیراعلی بی ایس ییدورپا نے اسمبلی اسپیکر کے لیے وشویشور ہیگڑے کاگیری کے نام کی تجویز دی اور بھارتیہ جنتاپارٹی کے رکن بسوراج بومئی نے اس کی حمایت کی۔اپوزیشن کانگریس اور جنتادل (ایس)نے اس عہدے کے لئے کسی امیدوار کا نام تجویز نہیں کیا جس کی وجہ سے مسٹر کاگیری کو اتفاق رائے سے اسپیکر منتخب کرلیاگیا۔ ڈپٹی اسپیکر کرشنا ریڈی نے وشویشور ہیگڑے کاگیری کی امیدواری تجویز ایوان میں رکھی جو بغیر کسی مخالفت کے پاس ہوگئی۔مسٹر کاگیری کو یدی یورپا اور اپوزیشن کے لیڈر اور کانگریس کے رکن سدھارمئیا اسپیکر کی کرسی تک لے گئے ۔یدی یورپا نے کہا کہ پارٹی کے سب سے سینئر ارکان اسمبلی میں سے ایک کاگیری کے تجربے سے ایوان کو فائدہ ہوگا۔ سدارامیا نے بھی وشویشور ہیگڑے کاگیری کے اسپیکر منتخب ہونے کا خیرمقدم کیا اور امید ظاہر کی کہ وہ منصفانہ طریقے سے ایوان کی کارروائی چلائیں۔سابق اسمبلی اسپیکر کے آر رمیش کمار،بی جے پی لیڈر کے ایس ایشورپا ،سابق وزیراعلی جگدیش شیٹار اور جے ڈی (ایس)کے رکن کے کمارسوامی سمیت کئی لیڈروں نے ایوان کی کارروائی بہترین انداز سے چلانے کے لئے ہرممکن تعاون دینے کا وعدہ کیا۔
