واشنگٹن ۔ یکم ؍ نومبر (ایجنسیز) امریکی صدر ڈونالڈ ٹرمپ نے حالیہ ہفتوں میں اپنے بیانات اور خطہ میں امریکی فوجی نقل و حرکت کے برعکس بیان میں کہا ہے کہ وہ وینزویلا پر فوجی حملوں پر غور نہیں کر رہے ہیں۔ امریکہ نے حالیہ دنوں میں کیریبین خطہ میں بڑے پیمانے پر بحری و فضائی فوجی قوت تعینات کی ہے جس میں جدید جنگی جہاز، طیارہ بردار بحری بیڑا ’یو ایس ایس جیرالڈ آر فورڈ‘ اور ہزاروں امریکی فوجی شامل ہیں۔ اس سے متعلق صدر ٹرمپ سے حال ہی میں صحافیوں نے سوال کیا کہ آیا وہ وینزویلا پر حملوں کا منصوبہ بنا رہے ہیں؟ اس پر صدر ٹرمپ نے مختصراً جواب دیا، ’نہیں‘۔ واضح رہے کہ امریکی وزیرِ خارجہ مارکو روبیو نے بھی اسی مؤقف کی تائید کرتے ہوئے میامی ہیراَلڈ کی ایک رپورٹ کو ’جعلی خبر‘ قرار دیتے ہوئے دعویٰ کیا تھا کہ امریکہ وینزویلا کے خلاف حملے کی تیاری نہیں کر رہا ہے۔
