واشنگٹن : 7جنوری ( ایجنسیز ) امریکی صدر ڈونلڈ ٹرمپ نے اعلان کیا ہے کہ وینزویلا سے 30 سے 50 ملین بیرل اعلیٰ معیار کا تیل امریکہ منتقل کیا جائے گا۔صدر ٹرمپ نے سوشل میڈیا پر جاری پیغام میں کہاکہ یہ تیل امریکہ میں مارکیٹ قیمت پر فروخت کیا جائے گا اور اس کی آمدنی کو وہ خود کنٹرول کریں گے اور اسے امریکی اور وینزویلا کے عوام کے فائدے کے لیے استعمال کیا جائے گا۔صدر ٹرمپ نے انرجی سیکرٹری کرس رائٹ کو ہدایت کی کہ وہ اس منصوبے پر کام شروع کریں اور تیل کو امریکی بندرگاہوں پر پہنچایا جائے۔امریکی صدر کے پیغام سے قبل غیر ملکی میڈیا رپورٹس میں بتایا گیا کہ وینزویلا سے تیل امریکہ برآمد کرنے کے لیے امریکہ اور وینزویلا کے حکام میں بات چیت ہوئی۔ خبر ایجنسی کے مطابق وینزویلا سے خام تیل امریکہ میں ریفائنریز کو برآمد کیا جائے گا۔امریکہ نے دسمبر کے وسط سے وینزویلا کے تیل درآمدات کو روک رکھا ہے۔توقع ہیکہ امریکی تیل کمپنیوں کے سربراہ وینزویلا میں سرمایہ کاری پر گفتگو کیلیے جمعرات کو وائٹ ہاؤس کا دورہ کریں گے۔ دوسری جانب وائٹ ہاؤس اور وینزویلا کے حکام نے نئی پیش رفت پر تبصرے سے گریز کیا ہے۔