دہلی کے رام لیلا میدان میں ’ووٹ چور گدی چھوڑ‘ ریالی سے پارٹی قائدین کا خطاب
نئی دہلی۔14؍ڈسمبر ( ایجنسیز) کانگریس نے دہلی کے رام لیلا میدان میں ’ووٹ چور گدی چھوڑ‘ کے عنوان سے ایک میگا ریالی کا انعقاد عمل میں لایا جس میں ملک بھر سے پارٹی کے سینئر قائدین، اراکینِ پارلیمنٹ اور بڑی تعداد میں کارکنان شریک ہوئے۔ ریالی کا مرکزی موضوع ووٹ چوری، انتخابی عمل میں شفافیت اور جمہوری اداروں کے تحفظ کا مطالبہ تھا۔ریالی سے خطاب کرتے ہوئے لوک سبھا میں قائدِ اپوزیشن راہول گاندھی نے مودی حکومت پر سخت تنقید کی اورکہا کہ ملک میں اصل لڑائی سچ اور اقتدار کے درمیان ہے۔ہندوستانی تہذیب اور تمام مذاہب کی بنیاد سچ پر ہے لیکن آج اقتدار میں بیٹھی قوتیں سچ کے بجائے طاقت کو اہمیت دے رہی ہیں۔راہول گاندھی نے الزام لگایا کہ حکومت ووٹ چوری کے سہارے اقتدار میں ہے اور انتخابات کے دوران پیسہ بانٹ کر اور ووٹر فہرستوں میں ہیر پھیر کر کے عوامی رائے کو متاثر کیا جاتا ہے۔ راہول گاندھی نے کہا کہ ووٹ چوری بابا صاحب امبیڈکر کے آئین پر براہِ راست حملہ ہے۔ ان کا کہنا تھا کہ اگر ووٹ چوری نہ ہو تو عوام چند منٹوں میں اس حکومت کو اقتدار سے ہٹا دیں۔ انہوں نے الیکشن کمیشن کی غیر جانبداری پر بھی سوالات اٹھاتے ہوئے کہا کہ الیکشن کمشنر ہندوستان کے ہوتے ہیں کسی حکومت کے نہیں۔ پرینکا گاندھی نے بی جے پی کو چیلنج دیتے ہوئے کہا کہ اگر وہ ایک بار بیلٹ پیپر پر ایماندارانہ اور غیر جانبدار انتخاب لڑ لے تو کبھی کامیاب نہیں ہو پائے گی۔ انہوں نے الزام لگایا کہ پارلیمنٹ میں ووٹ چوری اور ایس آئی آر جیسے اہم مسائل پر بحث سے گریز کیا گیا اور عوامی مسائل کو دبانے کی کوشش کی گئی۔دیگر قائدین نے بھی ریالی سے خطاب کیا۔ دہلی کانگریس کے صدر دیویندر یادو نے کہا کہ پانچ کروڑ سے زیادہ لوگ ’ووٹ چور، گدی چھوڑ‘ مہم کی حمایت کر چکے ہیں۔ سچن پائلٹ نے ووٹ چوری کے معاملے پر الیکشن کمیشن کی خاموشی پر سوال اٹھایا جبکہ گورو گوگوئی نے کہا کہ کانگریس کارکن ہر بوتھ پر ووٹ کی حفاظت کیلئے کھڑے ہوں گے۔دہلی کے رام لیلا میدان میں ’ووٹ چور گدی چھوڑ‘ میگا ریالی سے خطاب کرتے ہوئے کانگریس قائد راہول گاندھی نے مودی حکومت پر شدید تنقید کی اورکہا کہ مہاتما گاندھی سچ کو سب سے بڑی طاقت مانتے تھے، اسی لیے ’ستیہ میو جیتے‘ کہا گیا۔ راہول گاندھی نے آر ایس ایس سربراہ موہن بھاگوت کے ایک بیان کا حوالہ دیتے ہوئے کہا کہ وہ کہتے ہیں دنیا سچ کو نہیں بلکہ طاقت کو مانتی ہے جبکہ ہمارے نظریہ کی بنیاد یہ ہے کہ سچ ہی سب سے اہم ہے۔ ان کے مطابق موہن بھاگوت کا نظریہ سچ نہیں بلکہ اقتدار کو ترجیح دیتا ہے۔ انہوں نے الیکشن کمشنر گیانیش کمار پر الزام لگاتے ہوئے کہا کہ وہ بی جے پی کے ساتھ مل کر کام کر رہے ہیں۔ راہول گاندھی کے مطابق مودی حکومت نے الیکشن کمشنر سے متعلق قانون میں تبدیلی کی ہے جس کے بعد کمشنر کے خلاف کارروائی ممکن نہیں رہی۔ انہوں نے کہا کہ کانگریس اقتدار میں آ کر اس قانون کو بدلے گی اور ذمہ داروں کیخلاف کارروائی کرے گی۔ پرینکا گاندھی نے کہاکہ نہرو نے واضح کیا تھا کہ بھارت ماتا صرف زمین یا قدرتی وسائل کا نام نہیں بلکہ اس سرزمین کا ہر بیٹا اور ہر بیٹی ہی ’بھارت ماتا‘ ہے۔ اصل بھارت ماتا ہندوستان کے عوام ہیں۔اسی بنیاد پر ملک کے جمہوری ادارے قائم کیے گئے جن میں عدلیہ، میڈیا، پارلیمنٹ، سیاسی جماعتیں، اپوزیشن، حزبِ اقتدار اور الیکشن کمیشن شامل ہیں۔ یہ تمام ادارے عوام کے مفاد اور جمہوریت کے تحفظ کیلئے وجود میں آئے۔کانگریس رہنما نے کہا کہ آج جب انہی اداروں کو دبانے کی کوشش کی جا رہی ہے تو ہر ہندوستانی کو آواز اٹھانی چاہیے۔ ہڈا نے کہا کہ یہ تحریک پورے ہندوستان میں ووٹ چوری کے خلاف عوامی بیداری کا ذریعہ بنے گی۔