نئی دہلی، 5 اگست (یو این آئی) وزیر داخلہ امت شاہ نے آج الزام لگایا کہ ووٹ بینک کی سیاست کی وجہ سے جموں و کشمیر کو خصوصی درجہ دینے والے آرٹیکل 370 کو ختم نہیں کیا گیا ہے ۔مسٹر شاہ نے جموں کشمیر تشکیل نو اور جموں کشمیر ریزرویشن بل (دوسری ترمیمی) بل 2019کو راجیہ سبھا میں غور کرنے کے لئے پیش کرتے ہوئے کہا کہ آرٹیکل 370 ایک عارضی التزام تھا اور اسے بہت پہلے ہی ختم کردیا جانا چاہئے تھا۔ انہوں نے کہا کہ مودی حکومت میں سیاسی عزم کا فقدان نہیں ہے ۔ ہم ووٹ بینک کی سیاست نہیں کرتے ۔ وزیر داخلہ نے تین خاندانوں پر جموں و کشمیر کو لوٹنے کا الزام لگاتے ہوئے کہا کہ سب سے زیادہ رقم جموں و کشمیر کو دی گئی ، پھر بھی غربت کیوں ہے ۔ تعلیم اور نوکریوں میں دلتوں اور قبائلیوں کو ریزرویشن کیوں نہیں دیا گیا؟ انہوں نے کہا کہ 27 اکتوبر 1947 کو مہاراجہ ہری سنگھ نے جموں وکشمیر کو ملک میں شامل کیا تھا اور آرٹیکل 370 کا التزام 1949 کیا گیا ۔ اس شق کو ختم کرنے میں ایک سیکنڈ میں تاخیر نہیں ہونی چاہئے ۔
