ویب سائٹ اور مسڈ کال نمبر جاری، عوام سے شامل ہونے کی اپیل
نئی دہلی۔10؍اگست (ایجنسیز) کانگریس کے رکن پارلیمنٹ اور قائداپوزیشن راہول گاندھی نے ’ووٹ چوری‘ کے خلاف ایک نئی مہم کا آغاز کیا ہے۔ اس مہم کے تحت انہوں نے ایک ویب سائٹ لانچ کی ہے اور عوام سے اپیل کی ہے کہ وہ انتخابی عمل میں گڑبڑی کے خلاف کھڑے ہوں۔ انہوں نے اس مقصد کیلئے ایک مسڈ کال نمبر بھی جاری کیا ہے تاکہ زیادہ سے زیادہ لوگ اس مہم میں شامل ہو سکیں۔راہول گاندھی نے اپنے سوشل میڈیا پلیٹ فارمز پر ایک پیغام میں کہا کہ ووٹ چوری ایک شخص، ایک ووٹ‘ کے بنیادی جمہوری اصول پر حملہ ہے۔ آزاد اور منصفانہ انتخابات کیلئے صاف اور درست ووٹر لسٹ ناگزیر ہے۔ کانگریس کی الیکشن کمیشن سے واضح مانگ ہے کہ شفافیت دکھائی جائے اور ڈیجیٹل ووٹر لسٹ عوام کیلئے جاری کی جائے تاکہ عوام اور سیاسی جماعتیں خود اس کا آڈٹ کر سکیں۔اس مہم میں شامل ہونے کیلئے راہول گاندھی نے عوام سے درخواست کی کہ وہ ویب سائٹ votechori.in/ecdemand پر جائیں یا پھر 9650003420 پر مسڈ کال دیں۔ ان کے مطابق یہ لڑائی صرف انتخابی عمل کی درستگی کیلئے نہیں بلکہ پورے جمہوری نظام کے تحفظ کے لیے ہے۔راہول گاندھی کی اس اپیل پر سوشل میڈیا پر بڑی تعداد میں ردعمل سامنے آیا ہے۔ متعدد افراد نے ان کی پوسٹ کے کمنٹ سیکشن میں اپنی حمایت کے سرٹیفکیٹ شیئر کیے۔ ایک صارف، جن کا نام پرتیک پاٹل بتایا گیا نے لکھاکہ میں پرتیک پاٹل، #VoteChori کے خلاف ہوں۔ میں الیکشن کمیشن سے ڈیجیٹل ووٹر لسٹ کی راہول گاندھی کی مانگ کی حمایت کرتا ہوں۔اسی طرح ایک اور شخص، محمد شاداب خان نے اپنا سرٹیفکیٹ پوسٹ کرتے ہوئے لکھاکہ میں محمد شاداب خان، #VoteChori کے خلاف کھڑا ہوں۔ میں راہول گاندھی کی الیکشن کمیشن سے ڈیجیٹل ووٹر لسٹ کی مانگ کی حمایت کرتا ہوں۔ انہوں نے ساتھ ہی یہ پیغام انگریزی میں بھی تحریر کیا۔راہول گاندھی کی اس مہم نے سیاسی ماحول میں ایک نئی بحث چھیڑ دی ہے۔ کانگریس کا کہنا ہے کہ یہ اقدام انتخابی عمل کی شفافیت کو یقینی بنانے کیلئے کیا گیا ہے جبکہ بی جے پی اسے سیاسی حربہ قرار دے رہی ہے۔ تاہم سوشل میڈیا پر ملنے والا ردعمل ظاہر کرتا ہے کہ عوام بڑی تعداد میں اس مطالبہ کو سنجیدگی سے لے رہے ہیں اور فعال طور پر اس میں شامل ہو رہے ہیں۔ یہ مہم آنے والے دنوں میں انتخابی اصلاحات اور شفافیت کے حوالے سے بحث کو مزید تیز کرنے کا امکان رکھتی ہے۔