لکھنؤ۔ 4نومبر (سیاست ڈاٹ کام ) ویسٹ انڈیز کے خلاف 6 نومبرکو شروع ہونے والی تین میچوں کی ونڈے سریز سے پہلے افغانستان کے کپتان راشد خان نے کہا کہ میدان پر حریف ٹیم کی صلاحیت کے اندازہ کی پرواہ کئے بغیر ان کی ٹیم کا مقصد اپنی بہترین کارکردگی کا مظاہرہ کرنا ہوگا۔گھریلومیدان کے طورپرلکھنؤ کے اٹل بہاری واجپائی کے انا اسٹیڈیم میں اپنا پہلا میچ کھیلنے کے تیار افغانستان ٹیم کے کپتان راشد نے صحافیوں سے کہا کہ ہمارے لئے ہرسریز اہم ہے۔ یہ معنی نہیں رکھتا کہ ہمارا حریف کون ہے۔ ہمارے کھیل کی سطح اب بلند ہورہی ہے توہر سیریز ہمارے لئے اہم ہے اوریقینی طورپرہمارے کھلاڑی کامیابی کے مقصد کے ساتھ میدان پر اتریں گے۔ انہوں نے کہا کہ سب سے اہم بات یہ ہے کہ ہمارے سامنے ایشیا کپ اور ٹی 20 ورلڈ کپ جیسے دو بڑے ٹورنمنٹ ہیں، لہذا ہرسیریز اہم ہے اور ہمیں سریزدرسریزاپنی کارکردگی کو بہتربنانے پرتوجہ مرکوزکرنے کی ضرورت ہے۔ راشد خان نے کہا کہ ہماری منصوبہ بندی مضبوط ٹیموں کے ساتھ کھیلنا ہے،کیونکہ اس سے ہمیں کارکردگی کو بہتر بنانے کا موقع ملے گا اور ہم اہم مقابلوں میں مزید اعتماد کے ساتھ اتریں گے۔ بہترین ٹیموں کے خلاف کھیلنے میں ہمیں بہت کچھ سیکھنے کوملے گا۔ میچ درمیچ ہمیں پتہ چلے گا کہ کن کن شعبوں میں بہتری لانا ہے۔ انہوں نے کہا کہ اسپن بولروں کے موافق حالات میں ان کی ٹیم کو ویسٹ انڈیز پر برتری حاصل ہے لیکن ساتھ ہی یہ بھی کہا کہ صرف پچ کے بھروسے ہی نہیں رہا جا سکتا۔ آپ کو ہر حال میں محنت کرنی پڑتی ہے۔ ہمارے پاس بہترین اسپن شعبہ ہے لیکن اس کے لئے میدان میں خود کو ثابت کرنا ہوگا۔ راشد خان نے ایک سوال پرکہا کہ افغانستان کے کوچ لانس کلوسنرانتہائی تجربہ کارکوچ ہیں۔ انہوں نے جنوبی افریقہ کے لیے کافی کرکٹ کھیلی ہے۔ خوشی ہے کہ وہ ہمارے ساتھ ہیں۔ اس سیریز میں ان کے تجربے کا افغان ٹیم کو کافی فائدہ ملے گا۔ بہت کم وقت میں ہی دنیا کے چوٹی کے اسپن بولنگ میں اپنا نام درج کروانے والے راشد نے کہا کہ انہوں نے ویسٹ انڈیز کے کسی بھی کھلاڑی کے لیے خاص حکمت عملی نہیں بنائی ہے۔ میں نے اپنے لئے منصوبہ بنایا ہے۔ اگر کسی کھلاڑی کے لیے تیاری کی تو میری لائن اور لینتھ بگڑ جائے گی۔افغان ٹیم کی مدد کرنے کے لئے ہندوستان کا شکریہ ادا کرتے ہوئے راشد نے کہا کہ ہمیں ہمیشہ ہندوستان سے مدد ملی ہے۔ ہم نے ہمیشہ ان کے شکرگزار رہیں گے۔ افغانستان کے کوچ لانس کلوسنرنے اس موقع پرکہا کہ ہماری ترجیح ایک ٹیم کے طورپرخود کواورذہین بنانے کی ہے۔ ہماری ٹیم میں باصلاحیت کھلاڑی ہیں لیکن ہم اس بات پر خاص توجہ دیں گے کہ ہم میچ کے رخ کو بہتر طریقے سے سمجھیں اورمیچ جیتیں۔
