دبئی 29 ستمبر(یو این آئی )آئی سی سی ویمنز کرکٹ ورلڈ کپ کا 13واں ایڈیشن 30 ستمبر 2025 کو شروع ہو رہا ہے اور یہ مقابلے ہندوستان اور سری لنکا کی مشترکہ میزبانی میں ہوگا،جس میں دنیا بھر کی آٹھ نمایاں ٹیمیں حصہ لیں گی۔ ایونٹ کے دوران شائقین کو سنسنی خیز مقابلے دیکھنے کو ملیں گے اور ٹیمیں ٹائٹل کے حصول کے لیے ایک دوسرے کے خلاف میدان میں اتریں گی۔ 50 اوورز کے میگا ایونٹ کے کامیاب انعقاد کے لئے تمام تر تیاریاں مکمل کرلی گئی ہیں ۔میچوں کی میزبانی کیلئے ہندوستان کے چار شہروں بنگلورو، گوہاٹی، اندور، وِشاکھا پٹنم اور سری لنکا کے کولمبو کو منتخب کیا گیا ہے ۔ ٹورنامنٹ کا افتتاحی میچ بنگلورو کے ایم چنّاسوامی اسٹیڈیم میں ہندوستان اور سری لنکا کے درمیان ہوگا۔ ہندوستانی ٹیم سری لنکا کے خلاف جیت کا عزم رکھتے ہوئے میدان سنبھالے ہوگی۔ ونڈے میں ہندوستان نے سری لنکا کے خلاف کھیلے گئے 35 میں سے 31 میچ جیتے ہیں۔ مہمان ٹیم نے صرف تین میچ جیتے اور ایک مقابلہ بے نتیجہ رہا۔ یہ شاندار ریکارڈ گوہاٹی کے برسپارا کرکٹ اسٹیڈیم میں میچ کے موقع پر ہندوستان کو نفسیاتی فائدہ برتری دیتا ہے ۔ اس سال شاندار فارم میں رہنے والی کپتان ہرمن پریت کور اور سمرتی مندھانا بلے بازی پر حاوی رہیں گی۔ یہ ٹورنامنٹ 2 نومبر 2025کو فائنل کے ساتھ اختتام پذیر ہوگا اور اگر سری لنکا کی ٹیم سیمی فائنل میں پہنچتی ہے تو فائنل کولمبو میں ہو سکتا ہے ، ورنہ بنگلورو اس کی میزبانی کرے گا۔ ہندوستان کو یہ 1978، 1997 اور 2013کے ایڈیشن کے بعد خواتین کے عالمی کپ کی میزبانی کرنے کا چوتھا موقع ملا ہے جبکہ سری لنکا پہلی بار میگا ایونٹ کی میزبانی کر رہا ہے ۔آئی سی سی ویمنز ورلڈ کپ ٹورنامنٹ میں 8 ممالک کی ٹیمیں ٹائٹل کے حصول کے لئے نبرد آزما ہوں گی جن میں میزبان ہندوستان اور سری لنکا، نیوزی لینڈ ،ڈیفنڈنگ چمپئن آسٹریلیا،بنگلہ دیش، انگلینڈ،پاکستان اورجنوبی افریقا شامل ہیں۔ آسٹریلیا کی ویمنزٹیم نے 2022 میں اپنا ساتواں ٹائٹل جیتا تھا۔ ٹورنامنٹ رائونڈ رابن اورناک آئوٹ سسٹم کی بنیاد پر کھیلا جائے گا۔
