دبئی ، یکم ؍ستمبر (ایجنسیز) انٹرنیشنل کرکٹ کونسل نے ویمنس ورلڈکپ کی ریکارڈ انعامی رقم کا اعلان کر دیا ہے۔ اس ورلڈکپ کیلئے انعامی رقم میں 297 فیصد کا اضافہ کیا گیا اور مجموعی طور پر 13.88 ملین ڈالر کی انعامی رقم رکھی گئی ہے۔ ورلڈکپ جیتنے والی ٹیم کو رواں سال 4.48 ملین ڈالر ملیں گے جو 2022 کے 1.32 ملین کے مقابلے میں 239 فیصد زیادہ ہیں۔ اس کے علاوہ ورلڈکپ کی رنر اپ ٹیم کو 2.24، سیمی فائنل ہارنے والی ٹیم کو 1.12 ملین ڈالر ملیں گے، ویمن ورلڈکپ ٹیم میں شریک ہر ٹیم کو 2 لاکھ 50 ہزار ڈالر کی رقم ملے گی۔ آئی سی سی کے مطابق گروپ مرحلہ کے ہر میچ کیلئے جیت کی صورت میں 34,314 ڈالرکا انعام ہے۔ اس کے علاوہ پانچویں اور چھٹی پوزیشن پر7 لاکھ،ساتویں اور آٹھویں پوزیشن پر 2 لاکھ 80 ہزار ڈالر ملیں گے۔ آئی سی سی ویمنس ونڈے ورلڈکپ 30 ستمبر سے انڈیا اور سری لنکا میں کھیلا جائیگا۔
