آج بنگلہ دیش۔ سری لنکا اور آسٹریلیا ۔ نیوزی لینڈ کے درمیان مقابلہ
سڈنی ۔یکم مارچ ( سیاست ڈاٹ کام )آسٹریلیا میں جاری ویمنز ٹی ٹوئنٹی ورلڈکپ کے گروپ بی کے 15ویں میچ میں پاکستان کو جنوبی افریقہ نے 17 رنز سے شکست دیدی۔جنوبی افریقہ نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 136 رنز بنائے۔ کپتان ڈی وین نیکرک 3 رنز بنا کر آؤٹ ہو گئیں جب کہ لاؤرا ولرواڈٹ 53 رنز کے ساتھ ناقابل شکست رہیں جب کہ میریزینے کیپ نے 31 رنز اسکور کیے۔پاکستان کی جانب سے ڈیانا بیگ نے 2 جب کہ انم امین، ایمن انور، عروبہ اور ندا داڑ نے ایک ایک وکٹ حاصل کی۔جنوبی افریقہ کی جانب سے دیئے گئے ہدف کے تعاقب میں پاکستانی ٹیم زیادہ اچھی کارکردگی نہ دکھا سکی۔پاکستان کی جانب سے اننگز کا آغاز بلے باز منیبہ علی اور جویریہ خان کی جانب سے کیا گیا جو کہ بہترین کارکردگی کا مظاہرہ نہ کر سکیں، پاکستان کی پہلی وکٹ 18 رنز پر گری جس کے بعد ایک کے بعد ایک کھلاڑی آؤٹ ہوتا چلا گیا۔جنوبی افریقہ کے خلاف کھیلے جانے والے میچ میں پاکستانی بلے بازوں میں عالیہ ریاض 39 رنز جب کہ جوریہ خان 31 رنز بنا کر نمایاں رہیں۔پاکستانی ٹیم ہدف کے تعاقب اچھی کارکردگی نہ دکھا سکی اور 20 اوورز میں ٹیم 5کھلاڑیوں کے نقصان سے 119 رنز ہی بنا سکی۔جنوبی افریقہ کی جانب سے نانکولولیکو ملابا، شبنم اسماعیل اور ڈی وین نیکرک نے ایک ایک کھلاڑی کو آؤٹ کیا۔ قبل ازیں گروپ بی کے ایک اور میچ میں انگلینڈ نے پاکستان کو شکست دی تھی۔جنوبی آفریقہ کی ٹیم پوائنٹس ٹیبل پر گروپ بی میں اپنے پہلے دو میچوں میں انگلینڈ اور تھائی لینڈ کو شکست دے کر پہلے نمبر پر ہے جب کہ پاکستان کو شکست دینے کے بعد اب ٹیم سیمی فائنل میں پہنچ گئی ہے۔پیر کو دو میاچس کھیلے جا ئیں گے ۔ پہلا میاچ بنگلہ دیش اور سری لنکا کے درمیان ہوگا جبکہ دوسرا میاچ نیوزی لینڈ اور آسٹریلیا کے درمیان کھیلا جائے گا۔