کپ جیتنے ہندوستان کا خواب چکناچور ، 185 رنز کے نشانہ کا تعاقب کرتے ہوئے ٹیم انڈیا محض 99 رنز پر ڈھیر
ملبورن۔ 8مارچ ( سیاست ڈاٹ کام) خواتین کی ٹی 20 کرکٹ ورلڈ کپ کی چیمپئن کا سہرا آسٹر یلیا ٹیم کے سر سج گیا ہے ۔دفاعی چیمپئن آسٹریلیا نے انٹرنیشنل کرکٹ کونسل (آئی سی سی) ورلڈ ویمنس ٹی ٹوینٹی میں آج ملبورن میں کھلے گئے فائنل مقابلہ میں 85 رنز کے بھاری فرق سے شکست دے دی ہے۔ عالمی یوم خواتین کے موقع پر ملبورن کرکٹ گراؤنڈ میں کھیلے گئے میچ میں آسٹریلیا نے ٹاس جیت کر پہلے بیٹنگ کرتے ہوئے ہندوستان کے خلاف چار وکٹوں کے نقصان پر 184 رنز کا بڑا اسکور کھڑا کیا تھا۔آسٹریلیا کی اوپنر جوڑی نے اپنی ٹیم کو شاندار آغاز فراہم کرتے ہوئے 115 رنز کی برق رفتار شراکت داری نبھائی۔میزبان ٹیم کی جانب سے ایلیسا ہیلی نے 75 رنز بنائے جبکہ بیتھ مونی 78 رنز کے ساتھ ناٹ آؤٹ رہیں۔ان کے علاوہ کپتان میگ لیننگ 16 رنز کے ساتھ نمایاں رہیں۔ ہندوستان کی جانب سے دپتی شرما نے دو کھلاڑیوں کو پویلین لوٹایا۔جواب میں ہندوستان کی پوری ٹیم محض 99 رنز پر ڈھیر ہوگئی۔ انڈین ویمن ٹیم کی 8 کھلاڑیاں ڈبل فگر میں بھی داخل نہ ہوسکیں۔نشانہ کے تعاقب میں ہندوستانی ٹیم کا ٹاپ آرڈر مکمل طور پر ناکام ہوگیا اورا یک کے بعد دیگرے وکٹیں گرنے کا سلسلہ جاری رہا۔ ہندوستان کی پوری ٹیم 99رنز پر ڈھیر ہو گئی اور آسٹریلیا نے 85رنز سے فتح حاصل کرنے کے ساتھ ساتھ اپنے اعزاز کا کامیابی سے دفاع کرتے ہوئے پانچویں مرتبہ ویمن ٹی20 ورلڈ کپ کے چیمپیئن ہونے کا اعزام بھی حاصل کر لیا۔آسٹریلیا کی جانب سے میگن شٹ نے 4 اور جیس جوناسین نے تین وکٹیں حاصل کیں۔شاندار جارحانہ اننگز کھیلنے پر ایلیسا ہیلی کو میچ کا بہترین کھلاڑی قرار دیا گیا۔ ہندوستان کی جانب سے دپتی شرما 33، ویدا کرشنامرتی 19 اور رچا گھوش 18 رنز کے ساتھ نمایاں رہیں۔آسٹریلیا کی جانب سے میگن شٹ اور جیس جوناسن نے تباہ کب بولنگ کا مظاہرہ کرتے ہوئے بالترتیب چار اور تین وکٹیں حاصل کیں۔اس کے علاوہ نیکولہ کیری، دسلیلا کمنس اور صوفیہ میلی نوکس نے ایک، ایک کھلاڑی کو پویلین لوٹایا۔آسٹریلیا نے ریکارڈ پانچویں مرتبہ یہ اعزاز اپنے نام کیا ہے۔ اس سے قبل 2010، 2012، 2014 اور 2018 میں بھی کنگروز نے ہی ورلڈ کپ جیتا تھا۔ واضح رہے کہ پاکستان کی کرکٹ ٹیم کوئی خاطر خواہ کارکردگی دکھانے میں ناکام رہی اور ٹورنمنٹ کے پہلے مرحلے ہی میں باہر ہوگئی تھی۔