بیجنگ۔13 ڈسمبر(سیاست ڈاٹ کام ) ویٹ لفٹنگ ورلڈ کپ کے دوران چینی کھلاڑی نے عالمی ریکارڈ توڑنے کے بعد نیا ورلڈ ریکارڈ بنا دیا۔ تفصیلات کے مطابق انٹرنیشنل ویٹ لفٹنگ فیڈریشن کے زیر اہتمام چین کے شہر تیانجن میں آئی ڈبلیو ایف ورلڈ کپ میں خواتین کے 64 کلوگرام زمرے کے مقابلے ہوئے۔ مقابلے کے دوران چینی خاتون کھلاڑی ڈینگ وائی نے 117 کلوگرام وزن اٹھا کر نہ صرف دیگرکھلاڑیوں سے برتری حاصل کی بلکہ 116 کلو گرام اٹھانے کا سابق عالمی ریکارڈ بھی توڑ دیا۔ عالمی ریکارڈ توڑنے کے بعد انہوں نے پہلا مقام حاصل کر کے گولڈ میڈل اپنے نام کیا۔ میچ کے بعد میڈیا سے گفتگو کرتے ہوئے انہوں نے کہا کہ ورلڈ ریکارڈ توڑنا میرے لئے حیرت کی بات ہے کیونکہ پریکٹس کے دوران یقین نہیں تھا کہ ایسا ہوسکے گا تاہم کوشش جاری رکھی، نیا عالمی ریکارڈ قائم کرنا میرے لئے کسی بڑے اعزاز سے کم نہیں ہے۔
