ویلنگٹن۔15 فروری (سیاست ڈاٹ کام) اپنے کیریئر کا 100 واں بین الاقوامی ٹسٹ کھیلنے کی تیاری کرنے والے نیوزی لینڈ کے تجربہ کار بیٹسمین راس ٹیلر نے کہا ہے کہ انہیں کیریئر کی پہلی ٹسٹ سیریز کھیلنے کے بعد لگا تھا کہ وہ کبھی بھی ٹسٹ نہیں کھیل پائیں گے۔ ٹیلر اب تک 99 ویں ٹسٹ میچ کھیل چکے ہیں اور ہندوستان کے خلاف ویلنگٹن میں21 فروری کو ہونے والا میچ ان کے کیریئرکا 100 واں بین الاقوامی ٹسٹ میچ ہو گا۔ ٹیلر اس دوران کرکٹ کے تینوں فارمیٹ میں 100 میچ کھیلنے والے پہلے بیٹسمین بن جائیں گے۔35 سالہ ٹیلر نے 2007 میں ٹسٹ کرکٹ میں کرئیر کا آغاز کیا تھا اور انہوں نے جنوبی افریقہ کے خلاف اپنے پہلے ٹسٹ میں 15 اور چار رنز بنائے تھے۔ اسی طرح دوسرے مقابلے میں 17 اور آٹھ رنز ہی بنا پائے تھے۔ٹیلر نے کہاکہ جنوبی افریقہ کے خلاف پہلے ٹسٹ کے بعد مجھے لگا کہ میں اب ٹسٹ کرکٹ نہیں کھیل پاوں گا۔ میں بہت خوش نصیب تھا کیونکہ 2005 میں ٹی 20 کرکٹ آیا اور 2006 میں میں نے اس کرکٹ میں کرئیر کا آغاز کیا۔ وقت کے ساتھ میری کارکردگی کو دیکھتے ہوئے میرا انتخاب ٹسٹ ٹیم میں ہوا۔ کیریئر میں وقت بہت اہم ہے۔ٹیلر نے کہاکہ جنوبی افریقہ کے ساتھ پہلی سیریز کے بعد مجھے بنگلہ دیش کے خلاف ٹیم میں جگہ نہیں ملی۔ اس کے بعد میں نے انگلینڈ کے خلاف گھریلو زمین پر ٹسٹ سیریز کھیلی اور پہلے مقابلے میں ہی سنچری بنائی۔ اس وقت مجھے خود پر یقین ہوا کہ میں اس سطح پر بیٹنگ کر سکتا ہوں۔ اپنے ٹسٹ کیریئر کے تیسرے میچ میں میں نے سنچری لگائی اور ونڈے میں بھی تیسرے میچ میں میں نے یہ کارنامہ کیا۔ دونوں فارمیٹ میں اتنے کم میچوں میں سنچری بنانے سے مجھے اپنے اوپر یہ یقین ہوا کہ میں اس سطح پر کھیلنے کے لئے فٹ ہوں اور اس سے مجھے کافی مدد ملی۔انہوں نے کہاکہ میں نے اب تک اپنے کیریئر میں جو کچھ بھی حاصل کیا ہے اس سے میں بہت خوش ہوں۔ ٹیلر نے 99 ٹسٹ میچوں میں 46.28 کی اوسط سے 7174 رنز بنائے ہیں جس میں 19 سنچریاں اور 33 نصف سنچریاں شامل ہیں۔ انہوں نے 231 ونڈے میں 8570 رنز بنائے ہیں۔
